東瀛遊新品牌攻海外婚禮 VR眼鏡帶你「置身」沖繩教堂

EGL現時擁有日本超過30間教堂直屬代理權，袁灝頤指，公司對教堂好有要求，「同事親身到當地視察，環境、配套、食物樣樣都講究。

帶上（Virtual Reality，虛擬實境）VR眼鏡，就明白點解成本貴三倍，東瀛遊（EGL）都選用VR製作。黛安講緊，EGL旗下新品牌，一站式海外婚禮服務公司「Love's On」，新店噚日開幕，黛安即刻向東瀛遊執行董事助理袁灝頤（Christina）八卦下。

Christina話，EGL除咗開拓特色旅遊，如滑雪團等，2011年開始為首對新人服務，至2015年，每年平均為300對新人安排海外婚禮。睇中市場潛力，品牌去年開始籌備，「以前銷售用文字、圖片、影片，推出新品牌要考慮點樣提升服務質素。」

伊人又話，舊年外國有公司將VR應用喺睇樓，「外地客可以『行入』示範單位，概念同揀海外婚禮場地一樣」。考慮過360度影片，「價錢差三倍，最後都係覺得親身體驗最重要，親人帶上眼鏡好似置身其中，於是投資六位數字，派拍攝隊伍遠赴日本，多角度記錄現場實況。」品牌仲搵IPSOS做調查，發現逾三成新人揀日本做海外婚禮場地，加埋過去經驗，最後選定沖繩三間教堂Lazor Garden、Okuma同Monterey，做今次VR推廣嘅第一擊，有興趣嘅新人要留意啦！