保住靑春之道

人越大，越發現呢度痛，嗰度閉塞，嗰度又腫⋯⋯退化嘅症狀每一部位都顯現，令我有必要深入去探討中國嘅醫學。

中藥、針灸、跌打、推拿、按摩、拔罐、氣功、食療等多種治療手段乃傳統中醫學，以陰陽五行作為理論基礎，將人體看成為氣、形、神呢啲體系，通過望、聞、問、切，四診合參嘅方法，探求病因、病性、病位，分析病機同人體內五臟六腑、經絡關節、氣血津液嘅變化⋯⋯我一直都有接觸中醫師，每次去睇中醫我都冇特登記住佢哋嘅講解，有乜需要，我再搵中醫咪得囉，最重要係：講畀我聽都未必明白，所以唔會嘥時間，寧願有需要直接睇中醫！

近期我搵到一位女中醫幫我做艾灸中藥推拿，佢話我氣血不通，尢其係塊面特別水腫，問介唔介意幫我整到塊面細啲？我聲音高八度回答：「我真係介意你唔整到我塊面細啲囉！有邊個女人會介意自己塊面細㗎？」佢話：「好多人因為經絡不通，因而積水水腫，關節活動不靈，或產生痛症。」艾灸以至「藥灸」，都可以打通經絡，令經脈運行順暢，去除水腫及減少痛症，甚至提升面部，改善皮膚皺紋等。佢仲幫我喺嘴邊幾個位置撳吓附近經絡，我開始衰老而萎縮嘅婆婆嘴即刻膨脹番！神奇呀！

到咗今時今日我呢把年紀，除咗搵中醫診治外，自己原來真係唔好懶，可以喺洗面落妝嘅時候，喺面部做三分鐘推拿，將兩手手掌搓揉至微溫後，雙手貼於兩頰，輕柔地由內向外，按摩或旋轉式按揉臉頰。原來按摩臉部除咗可以供應血液比五臟六腑外，仲可以拉提臉部肌肉！

當了解這些面部經絡嘅分佈同關係，醫師可以幫你醫病痛，而愛美嘅自己，就可以自己動手保養自己嘅面容，延遲衰老，保住靑春！

（本欄逢星期四刊登）