別失去善良

喺中秋節，知道有豐子愷為題創作嘅舞台劇，加上今次飾演豐子愷係從癌症康復嘅張達明，相隔多年重返劇場幕前演出，我必須支持。

第一次睇到豐子愷嘅畫，係好多年前，喺初認識祁文傑家中作客時，睇到佢掛喺客廳中。我唔係一個文化人，對藝術冇造詣，只講feel......當時被豐子愷畫中嘅「童心」吸引，一見傾心印象深刻。因為祁文傑收藏咗好多豐子愷嘅作品，令我有更多機會，欣賞更多豐子愷嘅畫，發現佢畫中內容除咗有「童心」仲有「真心」同「本心」，令我感動。

豐子愷（1898-1975），浙江石門鎮人，佢係中國漫畫嘅創始人，其中所著畫嘅《護生畫集》，結合文學、繪畫、信仰，彰顯佛教慈悲、戒殺護生，與人為善嘅精神，對社會各階層，特別係兒童，發生影響至鉅。呢一套畫集當時我喺霑叔屋企個書房睇到，霑叔好慷慨畀咗我。

豐子愷不單擅於寫漫畫，亦懂音樂、寫散文、翻譯外語作品等。喺上世纪三十至五十年代，豐子愷嘅漫畫極受國人歡迎；佢別具一格，反映現實，充滿幽默，富有哲理及佛念嘅漫画，非常深入人心，影響一代又一代嘅人。

{{hket:inline-image name="010.jpeg"}}{{/hket:inline-image}}

喺舞台劇中，我先知原來晚年嘅豐子愷喺文化大革命時慘遭批鬥，每一日嘅上午，都可能有人敲門，捉佢出去批鬥、遊街示衆。經歷多災多難，雖然佢連開飯都成問題，佢仍然堅持身教、言教，教導子女善良同文化，勸勉子女保持善良：「我哋可以失去一切，但唔可以失去我哋與生俱來嘅善良。」

張達明喺2011年，確診第3期鼻咽癌，加埋重金屬中毒。就算而家好番，身體仲係虛弱，我知呢個病畀咗佢好多折磨，佢依然帶住正能量，面對困難，同豐子愷一樣，張達明充滿住童心、真心同本心做人。我見到舞台上嘅張達明，就好似見到當時嘅豐子愷一樣。令人動容。達明，加油！

（本欄逢星期四刊登）