苦等兩年推出Solo 林智樂恨奪新人獎

林智樂（Felix）前年參加無綫歌唱真人騷《聲夢傳奇》入行，當時他年僅17歲，是年紀最細的男學員。眼見同期出道的《聲夢》學員先後推出歌曲，Felix坦言等到好心急，最近終於推出solo歌《忘記趁早》。雖然Felix表示早已看化又不愛爭名逐利，但仍然希望能在樂壇頒獎禮上奪得新人獎，全為了答謝一直幫助和支持自己的人。

林智樂苦等兩年多終於有自己的作品，他膽粗粗邀請十分欣賞的音樂人澤日生作曲，「佢喺我心目中係大師級人物，無諗過可以搵到佢幫手，過程真係好奇妙。」Felix指歌曲感情拿捏不算太難，「當係畀自己嘅一封信，好直接咁唱，唔需要咁多包裝。」

《聲夢傳奇》比賽完結後，15位學員均獲簽約星夢娛樂旗下的「愛爆音樂」，並陸續獲得出歌機會。Felix是第13位學員出歌，他笑言等到頸都長，「等咗好耐，上年九月已經錄好首歌，等到好心急，因為身邊嘅朋友一路出歌，會諗幾時輪到自己呢？但後尾睇化咗，因為歌有歌命，呢首歌今年出都有好處，上年好大競爭，大家又無咁多心機去欣賞廣東歌。」Felix又直認自己恨攞新人獎，「因為得一次，有邊個唔想拎獎？身邊一直有好多人幫我同支持我，好感動，好想拎個獎返嚟多謝佢哋。」

努力在30歲前做出成績

等待期間，Felix未有鬆懈，一直裝備自己，「我一路都有練歌，每日練兩至三個鐘，我鍾意凌晨喺廁所練歌，因為回音夠大，最高紀錄唱成三、四個鐘，真係怪癖嚟。」Felix不但是「浴室歌王」，更嘗試填詞。其實兩年前，他已獲英國倫敦大學皇家賀洛唯學院錄取，不過因為參加《聲夢》而由英國返香港，現在已停學了兩年。「本身讀art and media（媒體藝術），最多可以停學五年，但我又唔想Zoom上堂，可能之後喺香港考大學，不過啱啱出歌，暫時都係工作行先。」今年20歲的Felix不時被指思想成熟，想法異於同齡人，他直言有一顆老靈魂，「好細個已經對呢個世界睇得好化，入咗行之後人生旅程推進咗十年，面對讚賞或負評，令自己嘅稜角磨滑。」不過他認為娛樂圈並非如外界所講的「大染缸」，而且比想像中和諧。入行初，曾設闖娛圈兩年時限，現時的Felix則認為事業才剛起步，希望30歲時做出成績來。

撰文︰林惠珊

攝影︰馮凱宜

美術︰梁政敏