新劇連場床戲認合拍 談善言愛賽後檢討嚇親柯煒林

談善言（阿談）和柯煒林（Will）主演的ViuTV原創劇《Food Buddies》，緊接劇集《那年盛夏我們綻放如花》於下周一首播。阿談和Will在劇中感情觀念開放，更有連場激情戲，阿談直言收到劇本時都覺得好激，更是她從影以來最多親熱戲的一部作品。

談善言和柯煒林在新劇《Food Buddies》的關係由交友app開始，問到二人可有透過這方式結識異性？Will笑言︰「試過拎葉鎮輝導演部手機去玩，唔知最後導演有無約出嚟，哈哈！」阿談則曾借用同事相片登記帳戶，不過當填寫交友條件及個人資料，她就卻步，「因為我唔識講大話，所以就放棄。」

阿談最怕黐身男友

阿談和Will形容在劇中關係是「不打不相識」，由最初看對方不順眼，到後來展開微妙的關係，Will笑言︰「我哋好多嘢都唔夾，但身體上（肉體上）好夾。」阿談則謂︰「我哋成日嘈交，將平時所有怒氣都發洩喺床事上，我哋都覺得對方好有挑戰性，挑起咗要征服對方的慾望。」而Will認為在現實中，一對伴侶中總會有一方願意作出讓步，他自認還在學習做一個好情人，「喺愛情上唔想做一個唔好嘅人，但有時會成為別人口中嘅壞人，愛情真係好難，所以我預咗一個人過一段長時間。」而阿談則認為只要另一半不要觸及自己的底綫便可，「我嘅底綫係要有自己空間，千祈唔好咁黐身。」

拍床戲少不免有裸露鏡頭，Will表示拍攝同期開拍ViuTV另一套劇集《冰上火花》，面對同劇的男演員努力操肌，自己也不敢怠慢，不過他還是對自己的身形欠缺信心。談及劇中的床戲，Will直言劇本描述相當激烈，不過鑑於電視尺度，最後畫面呈現不會太露骨。阿談和Will因拍攝電影《點五步》認識並成為朋友，但Will指跟阿談合作好有壓力，「今次係我第一次拍咁長嘅劇，阿談會喺現場捉住我背對白，佢對自己同對手嘅要求都好高，令我覺得自己經驗不足，好多文戲，對白又長，有段時間真係驚咗佢，會避佢！」原因是阿談喜歡「賽後檢討」，阿談笑言亦感受到Will一直在迴避自己。

柯煒林：

髮型︰Oscar Ngan

化粧︰Deep Choi

服裝︰SANDRO

談善言︰

服裝︰Weekend Max Mara

髮型︰Larry Ho@Aveda IL COLPO

化粧︰German Cheung

採訪︰Pauline

攝影︰林良明