人和寵物齊齊扮靚

時代真係唔同咗，有好多人唔生小朋友，將寵物視為己出錫到燶，我都係其中一個例子，因此普遍而家嘅狗狗生活，真係有好多高級過你同我；好多名牌已經有寵物系列了。我有個朋友隻狗搭私人飛機多過我，食嘢全部organic food，有專人按摩，我直接可以從佢對眼，睇到佢份驕寵同傲氣，簡直係做狗好過做人！

我屋企其中一隻松鼠狗Dom Dom，腳關節有問題，一早就想同佢做手術，但醫生話要先減肥。如果同佢跑步，佢對腳會痛，於是就周圍搵地方畀佢游水，活動關節兼減肥。終於有朋友介紹咗間高級Salon畀我，佢哋服務多元化，人、小朋友同狗狗嘅美容護理都有。狗隻仲有專人護理員陪佢哋游水，游完後仲有美容護理，等狗狗沖涼剪毛嘅過程中，我都可以喺佢哋隔籬有地方做埋修甲、頭髮或美容服務，果然係扮靚一家親！

無養過寵物嘅人，以為貓狗係畜生，其實佢哋嘅靈性有時比人更高。Dom Dom游完水，扮完靚，佢真係開心到笑出嚟，有相為證㗎。其實唔單止佢開心，我同兩個工人姐姐一齊，帶晒4隻狗出嚟，大家都好開心，之後再行商場，跟住再去餐廳食嘢，大家都不知幾high。

香港真係算慢人一步，好多國家之前已經有好多pet friendly嘅地方。好彩遲到好過無到，而家香港都有商場、食肆或酒店，允許客人攜帶寵物。天主教教宗方濟各都講到現今好多人唔想生仔，但佢哋養貓狗代替咗生孩子，既然呢個係鐵一般嘅現象，希望有更多地方可以開放畀我哋呢種父母，帶我哋嘅孩子去街街啦！

（本欄逢周四刊登）