《女子監獄》吳家麗陳瀅演母女 狼死周秀娜狂打李彩華

由周秀娜（Chrissie）、鍾欣潼（阿嬌）及李彩華主演的新片《女子監獄》昨日上映，飾演囚犯的Chrissie，因拒絕埋堆而得罪另一幫派大家姐阿嬌，Chrissie逐漸由被欺凌者變成獄中領導者。Chrissie更化身打女與李彩華大打出手，落手相當兇狠。

周秀娜在《女子監獄》中飾演女強人，因商業詐騙罪成入獄，Chrissie坦言角色有一定難度，「監獄係完全唔同嘅環境，需要用唔同方式適應，我個角色其中一個目標，就係要生存落去，要喺監獄中得到一個地位，就係呢個角色有趣嘅地方。」Chrissie笑言角色一副寸嘴樣，但在監獄中經常被打，「呢個角色唔識埋堆，變相有好多打鬥場面，但主要係我被打。」不過，她亦有反擊的時候，只見劇照中的她打女上身，一手撳低死敵李彩華的頭，又用力箍實對方的頸，打到李彩華眼凸凸兼面容扭曲。

陳瀅盡情演繹死女包

此外，陳瀅在戲中飾演一位反叛女兒，認為戲中母親吳家麗搞散家庭，因此非常怨恨對方。家麗姐因謀殺丈夫而被判入獄，兩母女在獄中重遇，可惜陳瀅拒絕認母，令家麗姐傷心欲絕。陳瀅笑言今次可盡情地演繹「死女包」的粗魯角色，又大讚家麗姐友善又專業︰「家麗姐完全明白點樣演繹，好帶動到場戲，加上今次係全女班，成班女仔好好玩。」李彩華亦大讚導演、監製用心拍攝︰「我哋會一齊研究用咩方式拍得更好，同埋平時大家都係以一個好靚嘅形象出現，但今次我哋就以寫實形象畀觀眾睇。」

撰文︰Iris

美術︰梁政敏