梁朝偉魅力沒法擋

我唔認識梁朝偉，但對佢嘅感覺卻好似一位老朋友般咁熟悉。我由佢做《430穿梭機》主持開始，到佢第一套有份做主角嘅電視劇《香城浪子》，同埋第一套電影《青春差館》都有睇㗎。咦！其實我都算係同佢分享咗好多佢嘅第一次喎，哈哈哈。咁樣講，自己都覺得自己唔知醜。

梁朝偉唔係我偶像，因為我個人太懶，從來唔追捧偶像，但一直以嚟對佢嘅印象都好好。相由心生，覺得佢係一個好純真無歪心嘅好人；時至今日佢笑起上嚟，仲有一股童真散發出嚟。正如佢自己都話佢係抽離人群，時刻同人保持距離，不過一旦佢當你係好朋友，佢會係你一生一世嘅忠心好友。

記得有一次我喺金鐘某商場行緊，發現梁朝偉正迎面而來，我哋四目交投，佢畀咗個禮貌嘅微笑，我差啲跪咗喺地，佢嘅電力果然係名不虛傳。到今時今日我仲記憶猶新，我真係無乜畀邊個男性嘅眼神電親過！佢真係魅力沒法擋呀！

梁朝偉係第一位華人演員榮獲威尼斯影展大會頒發嘅終身成就金獅獎。攞過無數獎項嘅偉仔，接過獎座時，嗰份開心笑容、感動落淚而捽眼，用非常好聽嘅英文真摯致辭，再加上活潑鬼馬嘅表情，完全係發自內心嘅快樂，好有感染力，旁人睇到都好戥佢開心！

恭喜梁朝偉可以獲得呢項殊榮，亦恭喜香港有呢位咁出色嘅演員為我哋爭光！（本欄逢周四刊登）