重返母校拍MV 陳健安升呢演老師

陳健安（安仔）最近推出新歌《仍然是那個少年》，歌詞內容是關於一班多年不見的中學同學，但友誼不變，當再聚在一起時仿如時光倒流的感覺。MV製作團隊特別重返安仔的母校仁愛堂陳黃淑芳紀念中學取景，並邀請了《全民造星V》參賽者羅子熙（Hei）、王希晉及《全民造星IV》的何洛瑤（Sica）演出，青春氣息爆燈。

安仔對重返母校拍攝感覺意義重大，「首歌講年輕時嘅成長經歷，我讀咗呢間學校八年，最青春、最黃金嘅歲月都喺呢度過。」安仔在MV中飾演老師「陳Sir」，大感新鮮，至於邀請三位新一代藝人參與拍攝，安仔則說︰「Sica畀人感覺好日系，呢首歌好重日系感覺，所以好想搵佢參與，而且好鍾意佢『癲癲得得』嘅性格。希晉外表就似啲頑皮學生，而Hei就有種懶洋洋嘅感覺，導演覺得佢哋三個合作會好有火花。」