加點創意 為環保出力

保護地球嘅意識真係好重要，因此支持環保，人人有責。Sustainability喺環保意識中非常重要，唔單止喺企業方面要實行「可持續性」，我哋嘅生活方式，大家都責無旁貸。

其實只要善用現有資源就可以減少一半碳足迹，令世界變得更好。生活上有好多廢棄物，只要我哋願意加多啲創意，就可以將廢物再度活化，循環再用，延續其價值。我哋每個人只要從生活細節上多啲源頭減廢，看似微小嘅努力，如果多啲人響應，多啲人願意出一分力，就足以為地球帶嚟正面嘅改變。

我而家每個星期都將可以回收嘅用品交去「綠在區區」。佢喺全港18區都設有回收環保站、回收便利點、回收流動點，我哋可以憑「綠綠賞積分卡」或「綠賞手機App」回收8類物品，賺取積分及換領禮品。嘻嘻，所以我好積極，每星期都帶住好多可回收物品，喺源頭分類及洗乾淨，之後就可以送去「綠在區區」回收。積極回收舊物，將不再需要嘅物品捐贈畀慈善機構或回收站，唔單止可以減少垃圾堆填區嘅負擔，仲可以幫助到有需要嘅人，幾好！

每次我喺洗完手，用抹手紙抹乾手或面後，通常都會再用嚟抹地或者抹狗尿盤。

用完嘅牙刷，我會再用嚟刷腳邊同腳踭，先唔講話環保意識，我發覺牙刷嘅size用嚟刷腳非常得心應手，咁又可以用多一陣。

飲完嘅茶渣或者咖啡渣，我整乾晒，又會放喺角落頭或衣櫃吸濕辟味。其實，只要用下你個小宇宙，再加啲創意喺其他方面重用，救到個宇宙之外仲可以搵到生活情趣，何樂而不為呢？（本欄逢周四刊登）