一個人去旅行

復常通關後，終於可以出征去大阪食雞泡魚。我係河豚fans，身邊所有朋友都唔「好」呢隻放毒魚，加上日本就嚟排放核廢水入海，個個已經開始連來自日本嘅魚生都唔食，所以更加要喺倒水前滿足我呢個食慾。

其實我好enjoy一個人去旅行，因為free到暈，瞓到自然醒，之後睇下社交媒體邊度有好介紹，之後就跟住個flow飄去呢度嗰度，總會發現到一啲新奇事，同我做人一樣，隨心過人生，沿途不停學到新事物，就會令自己好開心！

唔知點解我呢個閒人喺香港無所事事，卻又非常忙碌。只要喺屋企，我就會玩貓狗、睇電視、瞓覺……總覺得時間唔夠用。雖然屋企有好多書，基本上買咗但未睇過。一個人去旅行，反而有機會睇到一本書。喺異鄉嗰個氣氛下，令我更能夠集中精神，可以睇書、睇雲、睇人，跟住就會思考下人生。呢個咁平靜嘅畫面喺香港絕對做唔到，因為時刻人閒心不閒，之前我細個睇嘅鐵板神算內，都有呢句說話形容我！所以我而家人老咗，真係要學習令身、心、靈平靜安穩，多啲聽自己嘅內在聲音。

今次去到大阪，經過一間我之前時時喺嗰度買衫畀媽咪嘅服裝店，此情此景，觸景傷情，我企咗喺嗰度，非常掛念媽咪，絕對有︰「去年今日此門中，人面桃花相映紅，人面不知何處去，桃花依舊笑春風」嘅感受。

雖然我喺實體上觸摸唔到我親愛嘅媽咪，卻能感受到佢對我嘅保護。因為星期一朝早我上咗飛機後，就即刻橫風橫雨，颱風即時到達大阪，真係要感恩講一句，幸運是我！

（本欄逢周四刊登）