劇集《寵愛Pet Pet》播出以來，獲得觀眾一致好評，除了劇中的動物夠可愛之餘，難得的輕鬆喜劇情節為大眾帶來歡笑，監製絕對是功不可沒。過往陳耀全（Andy）監製的多套劇集都有毛孩的戲份，而這次應付近70隻小動物，比想像中還要困難，他大讚周嘉洛有一種親和力，希望自己可以在事業上再助他一把，並預告劇集後半部分，觀眾會見證到他的演技趨向成熟。
同場加映：
寵愛Pet Pet丨何沛珈感激角色牽引走出喪母之痛 勤做主持演戲入屋：媽媽係我榜樣
寵愛Pet Pet︳林夏薇周嘉洛靠金毛犬譜姊弟戀 嚴選五大無綫寵物電視劇集【下一頁】
Andy笑指由當上監製開始，劇集《愛我請留言》、《陪著你走》、《鐵馬戰車》、《平安谷之詭谷傳說》及《痞子殿下》都有至少1隻狗狗角色，他認為香港有不少視寵物為子女的觀眾，相信這類型劇集一定引來很多共鳴。稱︰「拍攝《寵愛Pet Pet》前做網上招募，反應真係好踴躍，好多主人都想為寵物留個記念，所以早前有一次宣傳我哋邀請晒佢哋出嚟，講真拍攝酬勞真係唔多，係希望喺呢件事上面多添一份意義，就係寵物主人嘅凝聚力。」
提到劇中主角「冬甩」Romeo，Andy笑言拍攝時全靠招浩明和他的未婚妻Sophia幫忙，他說：「最難忘係拍攝佢入診所搗亂嗰場，好多動作其實係浩明拎住個波波引佢玩，我哋再用電腦後期製作抹走個波。Romeo都係小朋友，有時會詐嬌或者發脾氣，之前有場戲唔想拍就挨住我大髀想我放佢走，有時我哋會叫浩明、Sophia離開現場先，Romeo搵唔到佢哋就會定定哋畀導演、嘉洛同薇薇去引導佢。」Andy大爆現場還有兩隻假「冬甩」毛公仔協助拍攝，一隻站著一隻趴著，好讓Romeo有更多休息時間。
寵愛Pet Pet丨招浩明睇首播激動淚謝未婚妻 爆Romeo煲劇睇自己演出等做視帝【下一頁】
Andy安排周嘉洛和林夏薇共譜「姊弟戀」，繼《痞子殿下》後再次跟嘉洛合作，他說：「佢有種魅力係唔知點解好想幫佢，佢對人熱情又有禮貌，成日都會諗有冇嘢可以令佢更加好呢？好少演員畀到我呢種感覺，只係嘉洛係咁。而薇薇我係第一次合作，一早知佢係熱情澎湃嘅人，相信佢兩個會好有火花，事實證明，開拍無耐佢哋已經熟絡咗。」對於不少評論指周嘉洛仍然有周星馳的影子，Andy說：「佢本身個人都好周星馳，而唔係扮周星馳，呢個係佢本質，拍完《痞子殿下》，佢出去拍其他劇，之後再合作《寵愛Pet Pet》，好明顯見到佢成長咗，後生真係吸收得好快，大家繼續追看落去，後半段會見到周嘉洛比較少見到嘅一面，相信大家會有驚喜。（兩套劇成就咗周嘉洛？）唔係，絕對係《愛回家之開心速遞》成就咗佢，而家出去拍嘢，好多人都仲係叫佢金城安。」
他表示《寵愛Pet Pet》主要描述兩人的感情關係，支線不算太多，有姜大衞、梁雯蔚的爺孫戀，以及徐榮和陳庭欣的女尊男卑的戀愛關係，Andy：「對應寵物對人類情感，人反而有時會太多思緒，因為年紀、身分影響咗愛嗰份純粹。」
TVB大部分監製都喜歡用自己的演員班底，Andy明白合作慣的好處，從《痞子殿子》到《痞子無間道》，幾位演員之間默契十足，熟知對方的習性；同時Andy都嘗試試用新演員，他大讚《寵愛Pet Pet》的古佩玲、何沛珈幾位新演員，表現令人大為驚喜。資料所見，Andy過往用得最多的一位演員，原來是楊證樺，至少12次，他說：「本身同佢熟啦，加上佢絕對係萬能綠葉，你畀咩角色佢，佢都用盡九牛二虎之力做好佢，就算行行企企人物，佢一樣努力去做。之後嘅《機場特警》，我將佢寫成識多國語言，又話佢係吹水王，結果佢完全準備好晒，連吹水哥啲對白都係佢自己去度，真係好佩服佢。我啲劇比較多群戲，希望可以寫到一種氣氛出嚟，而又畀到演員發揮所長，唔好當佢哋淨係襯托。」
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】
撰文：楊安莉
攝影：馮凱宜