溫拿開騷子孫上台演出 譚詠麟拒與囝囝合體

一共七場的《溫拿情不變‧說再見演唱會》前晚開鑼，溫拿五位成員譚詠麟（阿倫）、鍾鎮濤（阿B）、陳友、彭健新和葉智強，在三小時演出大曬親情。陳友與兒子及兩名孫仔孫女，三代同堂合唱《Sha La La La》。阿B則介紹19歲二女鍾懿上台︰「呢位百厭星上過溫拿嘅台三次，真係女大十八變。」鍾懿大展歌喉後，台下報以熱烈掌聲，阿B即說︰「睇到大家嘅反應就知佢無丟架。」及後熒光幕播出溫拿的昔日相片，阿倫自詡溫拿是「實力派天花板頂流天團」。

完騷受訪時，問到阿倫為何沒有安排兒子曉風上台？阿倫笑說︰「乜咁客氣呀，佢有睇，越洋咁睇，我畀條link佢就睇到。（唔喺香港？）事業為重。」阿倫又指每場騷都當作告別演出，「真係唱一場少一場，我哋唔係小鮮肉咁跳嚟跳去，依家係罐頭肉、午餐肉。」

採訪︰Pauline