令人開懷大笑電影

上星期一個人從上海搭飛機返香港，超級開心。有艷遇？No啦！就算有艷遇都唔會由頭笑到落機。我喺無心插柳、亂㩒嘅情況下，竟然揀到呢套叫《這個殺手不太冷靜》嘅電影，因為帶住headphone，聽唔到自己原來一路笑得好大聲，坐前面嘅客人曾擰轉頭望住我，我先發覺失儀！但唔好意思，真係忍唔住又再大笑！因為真係好好笑呀！

原來呢套戲係2022年嘅賀歲片，喺內地上映，雖然製作成本唔高，卻創造出一個喜劇票房奇迹，衝破26億元人民幣，成功將喜劇、舞台劇同電影元素結合起來。故事大綱係根據日本喜劇電影《魔幻時刻》改編，講述做臨記嘅演員魏成功，為咗實現自己可以做一次男主角嘅夢想，喺得到女演員米蘭嘅賞識後，意外地陷入一個用戲劇編織出嘅局中局故事……

《這個殺手不太冷靜》嘅笑點自然但唔低俗，錯位同誤會，製造一波又一波嘅笑點，幾乎5分鐘一小笑，10分鐘一大笑。我真係笑到喊，流晒眼水。真係好耐無睇過一套令我由頭不停笑到尾嘅電影啦，笑到卡卡聲，嗰度氣一直落到丹田，真係一個字：「爽」！笑完真係好舒暢。

兩日後，我同啲從北京嚟嘅朋友聚會時，分享我睇呢套戲嘅興奮，佢哋白眼我，話邊有我講得咁好笑。我條氣唔順，返屋企後自己再睇一次，依然令我由頭笑到尾囉！

你可能會鄙視我笑點低，郁啲就笑！但我覺得呢個亦係我嘅幸福！能夠隨時隨地可以搵到大笑嘅機會！（本欄逢周四刊登）