努力賺錢買「磚頭」 李治廷盼向任達華偷師

李治廷昨日出席中銀信用卡活動，透露目前正忙於拍攝劇集《守誠者》，首次飾演警察的他興奮表示︰「我着上軍裝覺得自己好威風，不過最近天氣熱，着住制服拍追逐戲都幾辛苦，劇組好多人都中暑，好彩我未有事，開工會隨身帶住支冰涼噴霧。」他又透露劇中有不少動作戲，自認身手不錯尚能應付。

新劇再度與任達華（華哥）合作，李治廷表示︰「之前第一次同華哥合作，唔係好熟比較少交談，今次再合作就好唔同，等埋位時就會傾偈，感覺自己升呢咗。」提到華哥在世界各地都有物業，可有和他交流投資心得？李治廷笑言︰「呢方面我仲未升呢，希望將來可以同佢傾呢方面話題。」他透露現時只在香港有物業，會努力儲錢買「磚頭」。

採訪、攝影︰Pauline