踏入九運如何順勢而行

古人好早已知從探索天體運行嘅規律中，太陽系同各大行星運轉嘅規律，令地球上嘅大自然同埋人事現象之間存在某種內在規律性聯繫！呢種天體運行規律不斷循環，啱啱好每顆星對地球發揮作用嘅時間為20年。2004至2023年，喺八卦中行土運，因此玄學上推算呢段時間地產運特別蓬勃興隆；由2024至2043呢20年，屬於九紫離火，即係行火運。

你可以話我八卦，但絕對唔係迷信。2021年我喺本欄已經提及踏入火運時，呢個世界會更加熱，呢個熱嘅程度，仲會帶嚟好多災難性嘅影響。

你可能會問︰知道又如何？你有無聽過「有早知，無乞兒」？我就係因為知而不為，畀啲地產股縛住做咗大閘蟹，真係差啲做乞兒！除咗火運對天氣有啟示，對當旺嘅行業都有啟示！九運有優勢嘅行業︰逢親同電、文化、網絡、科技、光等有關嘅行業及領域，都會充分發展。

呢個九運，對於時刻收埋自己喺舒適圈裏面嘅我，都要開始周圍去學習及見識下新科技、新事物，跟住呢個新世界趨勢，策劃下自己嘅前途。正如孔子所講︰「不知命，無以為君子也。」參考下呢個九運玄學提示，會唔會可以令我可以順水推舟？對我嚟講，信下無乜損失，何樂而不為？風水命理（玄學）喺中國學術領域上已累積咗數千年歷史，你可以唔信，但絕對唔可以認為佢流！只要唔盲目被神棍迷惑而令自己迷信嘅話，從學術方向了解及研究箇中較科學嘅一面及其道理，都可以當成其中一瓣處世應用之術㗎！（本欄逢周四刊登）