櫻桃小丸子任港鐵大使 宣傳扶手電梯安全

每日都有唔少人搭港鐵出行，其實鐵路同車站要運作暢順，有賴乘客嘅支持同配合。近年大家對使用扶手電梯嘅安全意識亦不斷提高，過去「左行右企」嘅口號，近年已由「左右兩邊企定定」取代。黛安聽聞，港鐵為咗進一步傳揚「握扶手唔好行左右兩邊企定定」嘅概念，今年特別徵召咗「櫻桃小丸子」做港鐵扶手電梯安全大使，仲製作咗一系列車站海報同宣傳短片。

港鐵更請咗電視卡通片嘅一眾《櫻桃小丸子》角色配音員喺港鐵站獻聲廣播，一眾角色更會現身於宣傳片《Stay Safe觀察學の扶手電梯篇》，以輕鬆幽默嘅方式教乘客使用扶手電梯嘅正確方法，相信大家都會記得佢哋講嘅「Stay Safe」4大安全語錄。

另外，港鐵喺本月至8月中亦會舉行不定時快閃活動，喺特選車站派發印有「Stay Safe」安全語錄及小丸子與家人同學為主角嘅限定紙扇㖭。