《靈戲逼人》暫別八婆角色 李漫芬扮苦命師奶含淚打老公

李漫芬（Fanny）過往經常演八婆角色，更曾被郭晉安封為「新一代八婆人選」。不過Fanny在前晚一集《靈戲逼人》中，飾演苦命媽媽，面對潛逃多時的衰老公蔡國威現身，Fanny喊住狂打對方，令不少觀眾感受她的委屈，相當搶戲。

《靈戲逼人》下周迎來結局周，前晚劇情開始進入高潮，除了主角張振朗與龔嘉欣的人鬼戀感情逐步升溫外，阿麗（劉芷玲飾）父親本山（蔡國威飾）與麗母（李漫芬飾）的街頭衝突戲亦是亮點。苦命師奶Fanny因欠債的蔡國威走佬多時，獨自照顧女兒阿麗及老爺，令她身心俱疲。前晚蔡國威終於現身，Fanny激動上前爆喊指摘之餘，更擸袋怒打老公，二人最終抱頭痛哭大團圓，場面感人。

蔡國威過足戲癮

演慣八婆角色的Fanny全程聲嘶力竭但沒有強谷眼淚，只是淚光在眼眶打轉，一頭亂髮更凸顯角色的無力感。她笑說︰「場戲喺西貢拍，好多人圍觀，記得綵排時我情緒已經到，到真拍時係一shot落，拍完導演都話感動，我好開心。」她表示今次最大突破，是終可暫別八婆生涯︰「今次演賢良淑德同受盡委屈嘅角色，我都花心思喺對白語氣度…好多謝監製信任我，亦多謝編劇寫得咁好，令到我投入幻想自己有個衰老公。」

至於蔡國威刻意一頭亂髮以配合角色︰「角色本身係好人，只係要走佬，所以造型落泊啲，咁啱嗰日西貢好大風，我就由自己個頭有咁亂得咁亂。」提到拍攝被Fanny怒打的戲份時，他說︰「我一開始叫Fanny放膽用任何手上嘅嘢揼過嚟，尤其佢手上嗰十卷廁紙，總之唔使留力。但佢錫住我，最初試戲仲有留手，好彩後尾大家情緒到，表現到我嘅內疚同佢嘅原諒。雖然短短兩場戲，但真係過足戲癮。」

撰文︰Iris

美術︰梁政敏