網絡欺凌

呢排N字平台有一套新上架嘅韓劇《絕世KOL》（Celebrity），以「網紅」呢個新興角色作為故事骨幹，其中一個恐怖角色，就係酸民喺網上欺凌……

乜嘢係網絡欺凌呢？任何人透過網絡發表敵意言論，企圖騷擾、恐嚇、詆毀、威脅、作弄、羞辱，令對方感到尷尬又或者不快，損害對方嘅聲譽或社交生活；再嚴重啲，會不斷用言語暴力，甚至進行杯葛行為，公開受害人嘅資料，即俗稱「起底」，惡意改圖，再喺圖中加上失實嘅文字，喺社交媒體公開侮辱受害人。

喺現實生活中，未必個個有guys兜口兜面咁發表自己嘅意見，但喺網上即可免除「面對面」，喺自己覺得安全自在嘅空間，以匿名發表意見，唔使負責任，㩒個send，就可以快速咁表達出自己對人對事嘅睇法。

心理學家研究發現，自尊心較低嘅人，當談論他人嘅缺點、貶低別人時，心裏面就會舒服。所以話，酸民喺酸人時，並唔係真係想提供正確、中肯嘅想法同建議，純粹只係「發洩情緒」！

酸民好多時背後原因，可能係自卑、自戀或者係無事搵事做，想引人注意。

無人鍾意被批評，但網絡愈來愈發達，酸民只會變多而唔會變少。一旦繼續同社交媒體連繫，咁我哋都要學習坦然面對呢一切，最緊要係增強自己嘅心理質素，千祈唔好太玻璃心，要有被「討厭嘅勇氣」；再高啲級數，就係睇到酸民時，能夠一笑置之。

（本欄逢周四刊登）