母親情緒對胎兒的影響

情緒同大腦息息相關，佢既然係身體嘅重要一部分，其他器官、皮膚都可以唔舒服，點解情緒唔可以病呢？當我哋發現自己心情時常出現唔妥時，就要正視佢！當我哋搵到因由，就可以去解結及進行治療。

我一直都很好奇，自己出身自一個幸福家庭，爸媽由細到大錫到我燶，點解我喺好快樂嘅關係中，仍時刻被一種強烈嘅不安感衝擊？疑團而家終於叫做解開咗。原來我喺3個月大時被遺棄，好好彩被我偉大嘅母親抱返屋企悉心養育。但嗰時候我仲係一個乜都唔知嘅BB，又點知道自己嘅遭遇呢？

日前去廈門，幸運地拜會咗一位好有經驗嘅心理學教授陳本蘭，佢係公安部心理教官、犯罪心理學教授、警察心理健康專家組成員、心理資訊及健康教育研究會副會長，而且係心理諮詢師協會理事長㖭。咁資深嘅一位教授，我梗係要向佢請教我嘅個案啦。

原來懷孕期間，個胎3周大時已可以感受到同媽媽情緒嘅連結。假設一個懷孕媽媽，一直都唔想要肚裏面嘅嬰兒，佢嘅說話、行為等，原來會令呢個小baby感受到。當佢平安咁出咗世，呢份憂慮已存入咗佢嘅潛意識內，喺日後嘅成長路上，潛意識有機會浮面，有機會影響佢嘅意識、情緒及行為，所以準母親陀B時真係要盡量帶住正能量呀。

喺短短幾個鐘內，陳教授只係同我分享咗佢知識領域嘅一小部分，已令我獲益良多，甚至連自己嘅心理枷鎖都解開咗。希望日後精神健康嘅知識及支援可以更普及，大家可以更了解自己嘅情緒！（本欄逢周四刊登）