《造星V》王鋒殺入10強 網民質疑ViuTV刪剪唱功負評

ViuTV節目《全民造星V》本周播出20強對決，被網民封為「造星契仔」的大熱參賽者王鋒，在前晚一集成功殺入十強，女評判王君馨及泳兒更是心心眼。不過，有心水清網民發現，男評判Edward Chan（陳浩然）在預告片中對王鋒唱功的負評，在正式節目中卻消失，質疑ViuTV刪負評保王鋒。

王鋒曾在比賽中因擅改舞步，遭不少網民負評。向來是評判寵兒的他，前晚跳唱《Make a Wish》，節目中的旁白君明寸他改舞步一事︰「警告你呀下，今次跟足啲step，咪再臨時爆招喇！」王鋒跳唱時，評判王君馨看得投入又尖叫，事後她狂讚王鋒︰「殺傷力都幾強！」另一評判泳兒亦心心眼，雖然王鋒唱歌時疑似走音，但泳兒只表示︰「唱歌方面，我比較介意係假音嗰幾個位置，係表演中嘅小瑕疵，我覺得唔係太重要。」明顯錫住評價。

「做工佬」Ritchie雖敗猶榮

不過，有心水清網民發現，評判Edward Chan在預告片中評王鋒唱功說︰「我哋理性番少少，唱歌我不能夠大庭廣眾咁讚美你…」但正式播出時這句評語卻被刪走。有網民不滿ViuTV只保留讚美評語，明捧「契仔」王鋒，亦有人表示「我就真係想聽Edward的真話，我覺得Edward講嘢係持平、中立」。

此外，大馬參賽者「做工佬」Ritchie（梁瑋城）前晚對戰Taco（黃泓祖），雖然Ritchie唱功出色，但Taco以rap功勝出入十強。事後不少網民戥Ritchie不值，認為擁有靚聲的他成功克服跳舞，比由頭rap到尾的Taco更有突破。

撰文︰Iris

美術︰梁政敏