《一舞傾城》搽指甲油坐監穿崩 陳法蓉憑喊戲獲推舉做視后

陳法蓉、唐文龍及姚子羚等前晚齊齊欣賞《一舞傾城》結局，提到「沙律媽」陳法蓉因老公唐文龍之死，認屍一幕真情流露令人動容，她說︰「我睇到都跟住喊呀，好痛苦，好慘呀！收到好多朋友短訊，佢哋都話一齊喊！」提到演出獲讚，她開心說︰「去到邊都有人叫我沙律媽，真係好開心，好有滿足感，雖然早兩日又撞傷腳趾，但開心令到我唔驚痛。」

有觀眾推舉陳法蓉憑喊戲力爭視后，她笑說︰「我又唔係親生女，幾時輪到我？不過好多人留言畀我，話我有機會提名視后，咁多人祝福我，已經當贏咗。如果有提名，我一定會飛返嚟。（有信心？）之前同閨密玩遊戲『我有你無』，朱茵話佢係影后，蔡少芬係視后，我都希望有個肯定。」此外，前晚大結局中，陳法蓉槍殺「屠伯」為劇中丈夫唐文龍報仇，因而被判入獄。雖然陳法蓉近乎素顏上陣拍坐監戲夠專業，不過她舉手時明顯見到塗了指甲油的手指，令人出戲。

採訪︰Pauline