披嫁衣慶祝結婚35周年 黃夏蕙宣布開拍自傳式電影

黃夏蕙（夏蕙BB）和潘炳烈結婚35周年，前晚在尖沙咀一間酒樓筵開80席慶祝，二人穿上婚紗禮服現身，恍如一對新人接受大家祝賀。

黃夏蕙為慶祝結婚35周年，前晚穿上婚紗招呼賓客，她稱是首次穿上婚紗，又指當年與潘炳烈於美國拉斯維加斯註冊，並沒有行禮，因此這晚特別開心。

潘炳烈被迫返港設宴

過往潘炳烈甚少出席公開場合，前晚罕有與夏蕙BB一起受訪，二人不時鬥嘴兼曬恩愛。問到潘炳烈送甚麼禮物給太太？他笑說︰「我無嘢送畀佢，我剩係攞同接受，佢好與唔好，我都會接受，（夏蕙BB有咩缺點？）怪脾氣！」而夏蕙BB則說︰「我哋有好多回憶，希望可以白頭到老，（老公送咩禮物？）送咗個心畀我。」

潘炳烈自言愛靜不喜應酬，並大爆︰「我本來唔會出席呢啲場合，今次特登美國返嚟，都係太太懇求我。」夏蕙BB即賣口乖，大讚老公高大威猛，有型有款，十分欣賞他。夏蕙BB又表示暫無意離港︰「之前去美國探女逗留咗半年，因為簽證到期，一定要返嚟。」身旁的潘炳烈即取笑太太︰「因為發脾氣掉咗張綠卡。」此外，夏蕙BB透露將開拍自傳式電影《夏蕙傳》，預計11月開拍，電影會以倒敘形式拍攝，因此會由小時候拍到老，問到兩人會否客串？潘炳烈即答︰「唔好講。」夏蕙BB則說一定會。

採訪︰Pauline

攝影︰林良明

美術︰梁政敏