母校面臨殺校 羅毓儀眼紅紅嗌不捨

無綫節目《東張西望》前晚報道，位於黃大仙的獻主會溥仁小學，因小一收生尚欠一名學生，而面臨殺校。在劇集《下流上車族》飾演蔓蔓的羅毓儀為該校舊生，她得悉事件後，立即與媽媽回到母校懷緬一番。

08年畢業的毓儀重踏母校，顯得十分雀躍，除了探望老師外，也細看昔日的學生照。毓儀到圖書館參觀時大吃一驚︰「環境同我細個嗰時完全唔同！媽咪係家教會一分子，當時搞咗個『故事媽媽』活動，邀請家長嚟圖書館講故事畀小朋友聽。我好有回憶，當時同學叫我媽媽做『麵包超人』，好搞笑㗎！」

走到昔日就讀的6C班房，毓儀感觸地說︰「呢間絕對唔係名校，係屋邨學校。我知道好多家長或者小朋友嘅目標，都係要入名校…但呢間學校會令到你變得（有）正確（價值觀）。細個嘅時候覺得成績好緊要，大個咗發覺有人情味，又或者點樣正確地面對一啲難題，先至係最重要。」如果母校真的被殺校，問她最不捨得甚麼？她雙眼通紅，熱淚盈眶說︰「所有嘢都會唔捨得！我依家有啲後悔，點解唔返嚟多啲？」