拒送高踭鞋給孻女 陳茵媺與陳豪外遊無「造人」

本月42歲生日的陳茵媺（Aimee），昨日出席護膚品牌開幕活動，Aimee早前與丈夫陳豪（阿Mo）撇低三子女到韓國外遊，享受二人世界。在圈中有多仔婆之稱的Aimee，笑稱暫時無意變四孩之母。

久未出席公開活動的陳茵媺，昨日神采飛揚出席品牌活動，她透露孻女Camilla昨日七歲生日，之前已為她開生日派對，並邀請了囡囡的同學們出席，而正日則會在家食蛋糕慶祝。問到準備了甚麼禮物給囡囡，Aimee回應︰「囡囡最鍾意同公主有關嘅嘢，好貪靚，佢啲公主裙比我啲靚裙仲多。」Aimee透露囡囡最想收到高踭鞋做禮物，不過遭丈夫陳豪反對，「囡囡平時成日試着我啲高踭鞋，但阿Mo覺得生日唔好送鞋，而且我都覺得高踭鞋對小朋友嘅腳部發展唔好，所以改送囡囡都喜歡嘅DIY手作同健康零食。」

二人世界被子女投訴

提到阿Mo日前在社交網發表寵妻宣言，Aimee也乘機表揚老公︰「我最冧係佢講完真係會做，又好樂意、好有耐性去幫我影好多靚相，拍片又拍得好靚。」另外，早前兩公婆到韓國旅遊享受二人世界，問到可有兩個去三個返？Aimee笑言︰「依家三個小朋友已經足夠，雖然我哋都鍾意小朋友，再有都唔抗拒，但唔會刻意追喇。」她大爆韓國之旅被子女們投訴，所以希望未來一家五口外遊，若懷孕便無法成行，故目前專心照顧三個年齡相近的子女。

採訪、攝影︰Steven

美術︰梁政敏