拒任歌唱節目評審 張學友自嘲「裙腳仔」棄移民

張學友前晚接受訪談節目《馬時亨‧香港情》訪問時，自爆當年突然由歌手變演員的原因，「當時（唱片銷量）由20幾萬跌到去十萬，再到25,000隻，我覺得『死喇，唔掂』，我係家庭支柱，要搵收入來源，我真係乜都接㗎喇。」提到學友曾獲邀任歌唱節目導師及評審，酬勞更高達九位天文數字，但他仍不為所動，「我比賽出身，覺得夠膽企上去唱已經好犀利，唔忍心話呢個唔得、嗰個唔得。同埋我唔知點樣教唱歌，真係唔識，我本身唔係正統學唱歌出身。」

另外，學友直認對香港有感情，曾兩度放棄移民，「我喺呢度出世長大，喺香港得到我所有嘅嘢，我唔可以控制人哋同下一代點諗，但我嘅經歷一路都喺呢度。20、30年前諗過移民去新加坡，後來亦諗過移民加拿大，我仲上去加拿大領事館，但諗到以後要對住嘅全部都係外國人，個心頂唔順就走咗。我係裙腳仔，黐喺嗰度就嗰度，對香港嘅感情真係放唔低。」