《隱形戰隊》CP互相鼓勵 林子善爆喊感激劉佩玥扶持

林子善在劇集《隱形戰隊》飾演失去左腳的「女女」，對兄弟忠心，對劉佩玥（Moon）更是痴心一片，演出七情上面，相當搶鏡。現實中的子善亦是性情中人，每當提到演戲路上遇到的伯樂、好友，抑或是最愛的太太和女兒，外形man爆的他即真情流露，數度爆喊，原來大隻佬也是用水造。

林子善16歲獲周星馳發掘，在電影《喜劇之王》飾演小混混洪爺，入行後發展不算一帆風順，但幸運地遇上很多貴人，幫助他成長。子善說︰「周生（周星馳）好好人，當我哋係小朋友愛錫，好開心有佢帶我入電影世界。佢教人嘅方式係直接話你知唔掂，到我大個咗諗番轉頭，就知佢每次話我、鬧我嘅嘢，都係好有用。例如以前我成日着hip hop衫，星爺話『咁好型咩？』，當時我哋拍緊《少林足球》，後尾我先明白，佢係叫我唔好成日覺得自己有型，要實幹啲。」

感謝伯樂星爺子華

在電影圈發展未見順利，子善一度轉行打碟，直到2005年入TVB拍劇。他表示有機會一直拍劇，全因黃子華。「無子華神，我就唔會留喺TVB拍劇。佢拍《一蚊雞保鑣》嗰陣我哋見過面，後來佢拍《奸人堅》，想搵一個人傍喺佢身邊，於是搵咗我。其實係子華神教我點樣喊，有場戲講我個角色出獄，見到有人接自己，就感動到喊；我好苦惱，唔知點演，佢話夾硬谷眼淚就唔係演戲，佢教我點樣投入角色，試下幻想一啲片段，結果正式拍嗰陣我喊到飛起！」

除了星爺和子華，子善感激不少圈中前輩對他雪中送炭，談到已離世的梁舜燕（Lily姐）及余子明時更激動落淚。「喺佢哋身上學到敬業樂業，就算拍到幾夜，都唔好趕住走，咁大年紀仲好有熱誠；我同子明哥好friend，佢叫我子善哥，成日玩我，我好掛住佢哋，好唔捨得佢哋走。」在TVB拍劇，子善最大的收穫是《鐵馬尋橋》的兄弟姊妹。「我哋之間邊個有事，大家就一呼百應！拍《怒火街頭》時，大哥（鄭嘉穎）特登早啲返廠睇我做戲，教我點做。拍《隱形戰隊》時好多場喊戲，二哥（馬國明）知我壓力爆煲，安撫我，叫我放鬆啲，喺我最唔開心時衝出嚟陪我。阿妹（唐詩詠）好窩心，撮合我嘅婚姻，又照顧我生活。三哥（黃嘉樂）最近有新發展，大家都想幫佢。」

承諾一生保護愛女

提到《隱形戰隊》的拍檔劉佩玥，子善亦忍不住哭，「爸爸成日教我做人要謙卑啲，可能謙卑過頭變咗自卑，成日覺得自己唔好，Moon有日捉住我訓話，叫我唔好咁無自信。我同佢無親無故，只係同事，佢浪費咗15分鐘同我訓話，叫我加油，好窩心，佢係最幫到我嘅幸運星。」演出大受讚賞，但子善無刻意簽約做TVB「親生仔」換獎，「我恨攞獎，但民選先係最重要，我要搵錢就唔會喺TVB，我心態係當返學校學戲。」

感性的子善，說到太太及三歲愛女林以晴令自己人生圓滿時，喊得更犀利，他向女兒承諾︰「將來有任何人傷害你，有乜事記得話畀『爸Boo』聽，我有生之年都會保護你、支持你。我都經歷過反叛期，覺得做乜嘢都無人明白自己，我明白嗰種孤獨同難受…到時如果真係有咁嘅情況，阿女，你記得話我知，我一定會用心聆聽。」

【一按睇片】

服裝︰Needless

場地︰Urban Coffee Roaster

撰文︰王連連

攝影︰陳健珊、何家賢

美術︰梁政敏