北海道獲獎湯咖喱專門店 6月首登陸香港

唔少港人對日本美食情有獨鍾，黛安收到風，北海道No.1、日本過江龍獲獎湯咖喱專門店「Suage北海道湯咖喱」將於6月登陸香港，佔地1,000呎嘅新店選址於旺角朗豪坊。公關姊妹話，「Suage北海道湯咖喱」位於札幌嘅總店自2007年開幕以來一直廣受好評，更被譽為「北海道第一湯咖喱」，仲喺多本日本雜誌及旅遊網站排行榜長居榜首位置，備受當地及各地遊客追捧！

品牌喺日本國內共有9間分店，當中札幌及東京分別有5間及4間分店，近年亦先後喺韓國及台灣開設6間海外分店，今次終於輪到喺香港開店喇，相信必定會掀起排隊熱潮。店內嘅湯底採用日本自家農場嘅原材料，提供10種主菜、細分99級辣度嘅3款湯底，搭配各款肉類、時令蔬菜及海鮮，為食客帶來層次豐富又獨特嘅味覺體驗；黛安聽聞品牌更會特別為香港區推出限定菜式及優惠，真係好期待啊。