應否跳槽 有幾點要留意

最近同幾位朋友飯聚，都不約而同講到公司環境同人手安排。原來唔少公司都醞釀緊精簡架構，有朋友嘅公司更已經率先出手，將low performance嘅同事請走，節省成本；部分甚至更改員工指引，將出差旅費、商務飯局報銷費用等取消，力求節流。

朋友們紛紛表示，公司士氣唔係太好，畢竟唔知幾時輪到自己。

老實講，經濟大環境確實唔太好，開源節流係必然出現嘅情況，但呢個都不失為一個機會，檢視一下自己現有嘅package，考慮是否留低或者尋找新機會。

轉工與否，其實要留意幾個元素。人工當然係第一個，不過其實一般嚟講，薪酬待遇其實唔單止人工，包括福利，例如年假幾多、醫療保險提供嘅保障、津貼等等，都好影響大家是否值得轉工。

近年唔少公司開始跟上外國企業嘅待遇，例如提供生日假、入職假，甚至男士侍產假等等，都開始受到關注，如果有意轉工，不妨留意一下對方提供嘅待遇。

另一樣要留意當然係職業發展空間。曉陽都遇過朋友查詢，問賺少啲人工去大公司，定搵多幾個錢去細公司磨練。

呢個其實涉及未來發展空間，大公司晉升架構一般會比較理想，有機會一步一步向上走，如果希望可以逐步晉升，理論上大公司會更好。當然，大公司人多，即係競爭都會激烈啲，大家要向上游就要更努力。

最後一個元素就係工作環境，例如工作量同薪酬不相符，或者上司同事之間經常有爭拗，甚至職場歧視，大家就應該考慮轉工。但新公司環境係點，無人知，所以最好先做功課，或者去面試期間留意對方辦公室環境，都可以發現端倪。