醉爆見真情 陳瀅：劉佩玥用手接嘔吐物

不少人閒時愛三五知己「嗒番兩杯」，藝人們也不例外。酒量因人而異，經常聽到不少醉爆搞笑事，靚女陳瀅分享最有義氣兼最核突的醉酒事件，而看似飲得的方力申則自爆酒量麻麻，認真「估佢唔到」！

自認飲得的陳瀅，數年前出席劇集慶功宴時，因太開心不懂節制而飲醉，要由好姊妹劉佩玥（Moon）送她回家。不過，陳瀅搭電梯時已忍不住嘔，Moon的一個舉動令她大感驚訝。

陳瀅說：「真係好核突，阿Moon用手接住我嘅嘔吐物，之後佢摷鎖匙開門，再抬我入屋！講起都對佢唔住，就算自己都唔會咁幫朋友，至少我唔會用手接住嘔吐物，可以想像到阿Moon好有義氣，到依家佢都仲會話我嘔落佢隻手度好核突！」她認為當時因溝酒飲，才會嘔吐大作，至於平日的酒量，她笑說：「總之唔弱啦！飲兩杯無咁易醉嘅。」

張曦雯︰ 飲醉變睡公主

張曦雯（Kelly）外表鬼妹仔，看似酒量不俗，她笑說︰「我飲酒係遺傳自媽咪嘅，本身比較鍾意飲烈酒，例如好似美國嘅Tequila，不過我就無計算過自己可以飲到幾多杯。（算唔算係酒筲箕？）咁我又未至於飲極都唔醉，不過喺朋友當中我都算幾飲得。」

Kelly表示醉酒後通常只會倒頭大睡，或去廁所狂嘔。問到她會否追酒飲？她笑言︰「視乎咩程度啦，好多朋友都以為我好飲得，以前細個仲會飲多啲，依家就純粹喺劇集慶功後，大家開心先飲少少。依家大個啦，宿醉要辛苦幾日，所以我都唔會無無聊聊坐喺屋企，會突然開支酒嗰啲人。」

方力申︰ 攬垃圾桶嘔足2個鐘

方力申（小方）當年以香港游泳代表隊身份入娛圈，他初時不斷提醒自己要保持形象，但有次與友人「摸酒杯底」傾偈，幾杯下肚後，小方大膽「溝酒飲」。他說：「飲咗之後發覺自己好唔掂，但又唔可以當場嘔，於是即刻跑去後樓梯，對住個大垃圾桶起勢咁嘔。」

過了不久，朋友到後樓梯找到小方，誰知他還未嘔完，又擔心繼續嘔，為此堅持不肯離開，「我攬住個垃圾桶嘔足兩個鐘，之後唔敢再溝酒飲。（酒量如何？）我唔算好飲得，不過一支紅酒都仲得嘅。」

採訪：Pauline

美術：梁政敏