拒做少奶奶求事業突破 熊黛林恨挑戰大奸角

熊黛林（Lynn）嫁入豪門不甘於做少奶奶，繼續努力發展事業。去年她有一半時間在內地開工，雖然令老公郭可頌詐型，不過對演戲充滿熱誠的Lynn卻永不言休，新一年更希望挑戰「衰到貼地」的大反派，笑言很想感受一下觀眾如何憎恨她。

熊黛林去年有半年時間在內地拍戲、拍劇，為了與家人度歲，在農曆新年前已回港。Lynn返港後第一時間為孖生女兒Kaylor和Lyvia準備拜年衫過年，反而未有時間為自己添置新衣，「因為對兩個女嚟講，新年係好重要同開心嘅節日，但對於我嚟講，只要一家人喺埋一齊就得喇。」由於早前內地疫情爆發，令Lynn的工作一再延期，故她留在內地時間變長，以致遭老公投訴她離港太久。她說︰「無辦法，疫情爆發要停工，我哋成個劇組都無得開工，浪費咗一個月時間，好彩之後接咗其他嘢做，有工作就要感恩。」如何𠱁番老公？她笑說︰「返嚟交人就得啦，自然就無事，唔使特別𠱁。」

Lynn指其實老公很尊重她的決定，從無要求她不要工作專心湊女。她直言︰「我長期喺屋企會無咁開心同好悶，個人會好hea，狀態就會好差；我有工作先有動力扮靚keep fit，希望畀大家睇到更好嘅我。」一對寶貝女兒今年五歲，會否追個小兔子？Lynn即斬釘截鐵︰「No！我呢個年紀唔搞喇，好辛苦㗎，再生真係高齡產婦，生完之後身體機能要幾年先修復番，同埋兩個夠晒數喇，依家屋企已經好嘈。」

封肚拒追兔B

去年在劇集《家族榮耀》中飾演潑辣少奶「葉彩薇」一角成功入屋的Lynn，當知道有觀眾嫌她演得不夠奸，一直希望能有機會再演奸角。她表示︰「上次啲觀眾覺得我反（派）唔晒，反而覺得我可愛同得意，有啲又話我傻更更同戇居，所以我好想試下大反派，真係要衰到貼地嗰啲，好想睇下大家係咪真係會好憎我，不過憎完我之後要愛番我。」過去一年努力工作，如何獎勵自己？Lynn笑說︰「女人都係離唔開衫同手袋，鑽石同樓就問老公，哈哈！」

服裝︰Ralph Lauren

髮型︰Derrick Ng@W workshop

化粧︰Ivan Lee

場地︰China Tang Landmark

鮮花盤花擺設︰八拾花火

採訪︰倪小珊

攝影︰Alma

美術︰梁政敏