擔正男一裸跑賀歲 張敬軒孖王菀之打到飛起

張敬軒與王菀之（Ivana）主演的賀歲電影《超神經械劫案下》將於本月21日年三十上映，兩人在片中有大量動作場面，軒仔笑稱他們是「牛池灣楊紫瓊」及「彩虹甄子丹」；而一向惜肉如金的軒仔更會與魏浚笙（Jeffrey）、白只在田野上裸跑，十分奔放。

張敬軒首次擔正電影男主角，電影在賀歲黃金檔上映，他表示電影以開心搞氣氛為主，並帶有黑色幽默。新片中有大量動作場面，軒仔表示︰「導演搵咗錢家班設計咗好多動作戲，有開真槍、爆破、耍棍、格鬥同吊威也等。」早前王菀之投訴被他打到周身瘀傷，軒仔笑言是用自己的骨頭去硬撼Ivana的肥肉。Ivana即如夢初醒表示︰「你真係解開咗我嘅謎團，拍攝時我哋懶專業咁，唔戴咁多護墊怕好臃腫，我諗住『食』幾下唔怕啦，點知第二日瘀晒，佢就一啲事都無。」軒仔笑稱自己已傷入骨，是內傷，而Ivana只是外傷。

軒仔和Ivana透露已看過試片，最可惜的是一場吊威也戲被刪掉，Ivana踢爆︰「我哋被吊高七呎，呢場戲充滿濃濃愛意，依家得番啲火藥味同重口味，希望有彩蛋可以重見天日啦！」軒仔則激讚動作場面精采絕倫，「睇完之後成個腦都係楊紫瓊同甄子丹對打，我哋最尾出嚟就係『牛池灣楊紫瓊』同『彩虹甄子丹』。」Ivana則笑指︰「我淨係諗到湯藥費同醫藥費，我要報工傷。」

Ivana不當黃子華是對手

電影還有魏浚笙、楊天宇及洪嘉豪等年輕演員，除了武打場面，更會大派福利。Ivana踢爆︰「你哋都好博喎，操到好fit，光天化日下着咁少布。」軒仔笑稱︰「未試過喺佢面前咁少布，仲有Jeffrey同白只，對王菀之嚟講好味又有啲滯咁囉！」軒仔透露三人在田野裸跑，自嘲為藝術犧牲，盼能在影壇得獎，「裸露程度應有盡有，總之係驚喜定驚嚇就要睇年齡層，對於無乜見過世面嘅，應該係驚喜多啲，但係睇韓劇多就驚嚇多啲。」今年的賀歲片還有黃子華的《毒舌大狀》，Ivana曾於《飯戲攻心》與對方合作，今次卻打對台，Ivana稱︰「我唔會當子華神係對手，希望大家入場睇晒兩套戲。」

張敬軒

髮型︰ Ritz Lam

化粧︰ Cyrus Lee

造型︰ Constance Lee

服裝︰ Feng Chen Wang @ LaneCrawford

鞋履︰ Christian Louboutin

首飾︰ APM Monaco

王菀之︰

化粧︰ Janice Tao

髮型︰ Jo Lam@SALON TRINITY

服裝︰ 45R

場地︰灣仔駱克道81號

攝影︰Alma

採訪︰倪小珊

美術︰梁政敏