蘇韻姿暫別《愛‧回家》 劉丹代「熊心如」求情︰緩刑啦

《愛‧回家之開心速遞》演員劉丹（丹爺）、滕麗名、呂慧儀、樊亦敏及陳浚霆等昨日現身電視城，齊齊以新春打扮宣傳劇集。近日盛傳飾演熊心如的蘇韻姿因工作態度差及遲到而被安排「離家」，劇中父親丹爺「愛女」深切，出口術求情：「我唔覺得佢工作態度唔好。」

今天79歲生日的劉丹，昨日獲劇組送上蛋糕慶生，他透露生日亦要開工，不過十分期待孫女所送的禮物。提到劇中女兒蘇韻姿被指因遲到、態度差及演技無進步三大罪狀，而被迫暫別劇組，丹爺即說︰「你都話暫別啦，我哋套劇好多人離開咗都會返嚟！」身旁的滕麗名亦出手解圍︰「點解唔問我掛唔掛住金城安（周嘉洛）？」

唔覺「愛女」態度差

蘇韻姿被指經常遲到及態度欠佳，丹爺即幫「愛女」說盡好話：「我無聽過，亦唔覺得佢工作態度唔好，當年佢新人好多規矩唔識，有少少矇查查，我哋都有教下、提下佢，阿姐（曾勵珍）都搵過佢傾偈。」有指滕麗名、呂慧儀也幫口向高層求情，丹爺即說︰「有。（想心如盡快返嚟？）應該要緩刑啦！」在旁的滕麗名即說︰「私人意見與本人無關，最緊要開廠。」至於《愛‧回家》監製林建祥解釋，蘇韻姿與「歸蜀明」繆家慶暫別劇組是正常調動︰「以前偶然都發生，有啲藝員有私事或者拍其他劇，對藝員亦何嘗唔係好事？畢竟拍咗《愛》劇五年，試下其他環境都係好事。（蘇韻姿快回家？）會！好快返嚟。」

撰文：Steven

採訪︰楊安莉

美術：梁政敏