四年抱三 陳凱琳誕細仔趕做虎B

陳凱琳（Grace）與鄭嘉穎於18年結婚，先後誕下兩名兒子，去年尾Grace宣布陀第三胎，事隔不足三個月，原來前日她已秘密入院誕下細仔，成功趕及做虎年BB𢭃利市。第三度榮升爸爸的鄭嘉穎，昨日回覆本報表示母子平安。

陳凱琳與鄭嘉穎結婚以來，一直落力組織大家庭，先後誕下大仔鄭承悅（Rafael）及二仔鄭承亮（Yannick）。去年11月，Grace在社交平台宣布懷第三胎，但未有透露性別。原來Grace前日（11日）已入院生B，第三胎亦是兒子，成功趕及做虎年BB，慶祝農曆新年及𢭃利市。成為娛圈多仔公的嘉穎，昨日回覆本報說︰「母子平安，多謝關心。」

鄭嘉穎心痛太太水腫

現年53歲的嘉穎日前出席活動時，才為太太陀B辛苦而大表心痛，透露Grace有水腫及抽筋的情況，「佢（Grace）雙腿幾幼大家都知，竟然可以水腫到見唔到腳眼，佢梗係唔開心，我惟有安慰佢，呢啲日子好快過！」身為愛妻號的嘉穎，亦出手為太太按摩。問到Grace生完第三胎是否正式封肚，當時嘉穎只說︰「其實我一直都係順其自然嘅，順着走囉。」未知會否再追第四胎生個女兒，令嘉穎一圓「外父夢」。此外，嘉穎與《鐵馬尋橋》拍檔唐詩詠情同兄妹，詩詠昨日亦恭喜「大哥」嘉穎再度榮升父親︰「恭喜嘉穎，辛苦喇，三個小男孩，睇到嘉穎嘅基因，可能每一個都變成運動健將，好開心！」

撰文︰Iris

美術︰顏玉玲