ERROR成員郭嘉駿（193）於本月14日生日，他一早向公司請假到日本旅行，本來人在日本的他，昨日卻現身時裝店開幕活動。193自爆為了賺錢即時改變行程，立即買機票飛返香港，日本之旅由本來的兩星期變成五天，他又自嘲十分熱愛工作。
郭嘉駿、女團COLLAR成員沈貞巧（Gao）、王家晴（Candy）和關智斌等，昨日於銅鑼灣出席時裝店開幕活動。原本正在放生日假、身在日本的193為了出席活動，不惜中止假期，以一身潮人裝束現身。193透露昨晨剛落機便趕來活動，「因為呢個係fashion活動，公司問我想唔想接，咁有錢搵梗係接啦，不過我嘅假期其實未完嘅，依家考慮緊再飛返去日本繼續放假。」另外，提到近日MC張天賦歌迷欲買演唱會門票而被騙24萬元，193即呼籲粉絲切勿買黃牛，他搞笑表示︰「係都被我呃，唔好被其他人呃吖嘛。」
至於COLLAR隊長Gao則剛度過30歲生日，她透露正日跟家人慶祝，「我同自己講過，踏入三字頭每一年生日都要同父母一齊過，當日帶咗佢哋四圍去應援巴士燈箱打卡。」她有感踏入三字頭是人生另一階段，「30歲後係人生嘅黃金時間。」而Candy則透露稍後與隊友許軼（Day）主持一個綜藝節目，問到會否接受要性感上鏡？她笑言︰「咁睇下酬金係咪吸引喇。」
Kenny與張致恒少聯絡
此外，於上月尾生日的關智斌（Kenny）表示收到很多粉絲送禮，「我發覺fans真係有錢咗，我出道嘅時候仲係細路女嘅fans，有啲已經做咗媽媽，佢哋送名牌、iPad等，最特別收到六盒退燒藥，仲要喺炒價時送畀我。」另外問及張致恒再傳離婚，Kenny表示︰「家家有本難念的經，家和萬事興呀，其實我同佢都少咗聯絡。（覺唔覺得佢好懶？）我都有懶嘅時候，我相信佢會負責番做爸爸嘅責任。」
採訪︰Pauline
美術︰梁政敏
攝影︰林良明