從小受濕疹困擾曾狂發脾氣 劉穎鏇自責讓媽媽難受

劉穎鏇（Tiffany）16年由美國來港選美獲亞軍，隻身發展多年，早前憑《超能使者》的「Open」一角獲觀眾認同。眼前身形高瘦、皮膚滑溜的Tiffany，原來從小飽受濕疹困擾，試過難以忍受而發媽媽脾氣；長大後病情受控，但又因來港追夢而與父母相隔兩地，令她十分自責，所以希望更努力發展事業，好讓父母有更舒適的生活。

劉穎鏇在2016年當選港姐亞軍、獲最上鏡小姐及現場最受歡迎佳麗獎，看似平步青雲，但原來背負沉重壓力。「電視熒幕上嘅我好高大，膊頭好橫，大家覺得我好大隻。我好唔滿意自己身形，唔想見到『大隻』呢兩個字，於是強迫自己減肥，但正正係我人生中身體最差嘅時間，當時心諗如果我可以矮多幾厘米，或者會舒服啲。」

除了身形問題，濕疹亦令Tiffany非常苦惱。「濕疹嚴重到無法想像，由大髀到腳腕位置，我抓到皮膚損晒，選美時濕疹都有復發，成日好驚雙手潰爛到一撻撻。」從小飽受濕疹困擾的她，坦言以前不懂事，常將痛苦發洩在家人身上，經常向媽媽發脾氣，「雖然我知唔係媽咪嘅錯，但佢每次幫我搽藥膏，佢都會話情願有病嘅人係佢，我每次聽到心入面好唔舒服。每晚媽咪半夜起身睇我有無抓傷皮膚，有時痕到入心，佢就會喺我床邊捉緊我隻腳。依家諗番，覺得自己好唔識體諒佢，當時我太痕太辛苦，發咗唔少脾氣，媽咪受咗我好多難聽嘅說話。」

望給父母更舒適生活

Tiffany並非富二代，但父母給她的一切從不缺乏。由於她是獨生女，媽媽不捨她隻身離家，於是派爸爸陪伴她來港，一家三口分隔兩地。Tiffany去年初返美國探望媽媽，眼見媽媽變老，令她倍感自責。「我喺度諗，嚟香港發展係咪好自私呢？早幾日，媽咪話佢唔小心喺屋企跌親，其實我好驚，佢一個人住，如果有咩事發生，我照顧唔到佢。我呢個女好不孝，25歲人，仲未能夠好好照顧兩位老人家，反而分隔咗佢哋。我好想媽咪多啲返嚟陪我，希望盡快有足夠能力，等佢哋一齊好好生活，有爸爸照顧媽咪，我個心先舒服啲。」

Tiffany過去一年發展不俗，更獲提名台慶頒獎禮「飛躍進步女藝員」，「呢一年我喺工作上好幸運，我知道有人批評我『中文都未講好，點去演戲』，我知道嘅，如果想成功，一定要克服呢個問題，將來先會有更好嘅劉穎鏇！」

【一按睇片】

髮型︰Sue Cheung

服裝︰ba&sh

場地︰古今二 （THE ONE）

採訪︰陳小芝

撰文︰楊安莉

攝影︰黃敬博、何家賢

美術︰顏玉玲