炎明熹唱歌老師 高晨維陪伴學生經歷人生順逆

在無綫音樂比賽《聲夢傳奇》中，一班年輕學員表現出色，包括冠軍炎明熹（Gigi）、詹天文及冼靖峰等，他們不約而同跟唱歌老師高晨維（Cleo）學唱歌。Cleo視一班學生如囝囝囡囡，十分肉緊，無論是學生的唱歌技巧或內心世界，她都照顧周到。Cleo如此體貼，全因她曾是歌手，以自身經歷鼓勵學生，陪伴他們走上燦爛星途。

1998年，只得13歲的高晨維，參加《新城997 Top One新一代-劉德華慈善歌唱比賽》公開組並勇奪冠軍，隨即跟唱片公司簽約，極速出碟做歌手。星途看似順暢，但娛樂圈很「實際」，對於一個從未踏進社會工作的女孩來說，萬般不習慣。她說︰「人事關係好複雜，我要獨自面對。可能有啲歌手要等幾年先出到歌或者出碟，但我一簽完立即出碟，或者會令身邊人難受，佢哋對我嘅態度唔係咁好。試過有音樂人寫咗歌畀我，但後來首歌畀咗其他人唱。」小小年紀的Cleo，就是不懂娛圈的「遊戲規則」。

不想咪嘴寧放棄做歌手

Cleo一心只想單純地唱歌，卻因兼顧太多唱歌以外的事情，令她萌生去意。「當時我決心要離開，係因為經常唱歌唔可以真唱，要咪嘴唱。我練歌練得咁辛苦，做咗咁多預備工作，我只係想上舞台唱歌啫，連呢樣嘢都搶走埋，我覺得好無意思，就同老闆講咗『我要走』。」

堅持原則說走就走，Cleo欲重返校園時，家中卻遭逢巨變。母親告訴Cleo，家中出現經濟問題，面臨破產，年紀輕輕的Cleo要打工養家。雖然上天關了一扇門，但也打開一扇窗，當時Cleo其中一份工作，便是教小朋友唱歌，驅使她後來成立唱歌學校。她回想時慨嘆︰「我以前跟秦燕老師學唱歌，佢好早過身，無辦法好似我依家咁樣，同學生一齊面對問題同困難、順境逆境，企喺前綫同佢哋一齊過！我以前真係…好多嘢唔識得點處理。」

從未後悔退居幕後

Cleo以過來人身份，不斷為學生排解困難，「做得呢行，多少都會經歷起跌。咁啱我十幾歲時經歷過，我想將自己嘅經驗，提早畀啲意見學生。」她有教無類，對每個學生都十分肉緊，即使放假也會花時間跟學生練習，甚至在家中陪伴學生練唱，又跟學生聊天放鬆心情。例如Cleo會跟愛徒炎明熹在家中天台一起看海，令心靈得以平靜。「我識Gigi嗰陣，佢得12、13歲，睇住佢依家有第一個小成就，每一個過程、階段，我都會好肉緊同緊張，我擔心佢會因為一次做得唔好，就會失去信心。」

從幕前歌手到幕後教唱歌，Cleo坦言去看演唱會時，也想過自己有能力成為台上主角，但她從不後悔退居幕後。「如果再畀我揀多一千次、幾百萬次，相信我當時都會離開。我希望利用自己嘅經驗同唱歌技巧，幫到有夢想嘅後起之秀，增加佢哋踏上舞台嘅機會，甚至成為真正嘅歌手，呢個先係我嘅夢，我從來無離開過音樂。」說時挺起胸膛，成功建立自己的人生舞台，她找到無比快樂。

【睇片】

撰文：王連連

攝影︰何家賢、林君茹

美術：梁政敏