CY陳宗澤望明年開騷 衛詩雅反串做陳家樂兄弟

衛詩雅（Michelle）與樂壇新人陳宗澤（CY）昨日出席「U Beauty Awards 2022」，上周38歲生日的Michelle，表示生日願望是到外地過白色聖誕：「呢排好好彩，都幾多廣告代言，拍埋廣告就可以去旅行，但未諗去邊度，機票都未買。（有男伴陪玩？）唔一定有男伴，最緊要放假。我唔心急拍拖，隨緣啦！（多人追？）正常啦，睇下先！」叫好友陳家樂介紹男仔？她笑說：「無用㗎佢，我介紹畀佢識就差唔多，不過佢唔使啦，就嚟結婚。佢邀請我做兄弟團，我話『你啲兄弟質素麻煩高少少』，但我哋全部都識。」

CY昨日獲頒「U Beauty活力時尚之最大獎」，他笑言平日經常紮紮跳，絕對是活力擔當。提到各大樂壇頒獎禮將至，問CY可有信心獲獎？他說︰「我無諗太多獎項，有獎係bonus，無就檢討下自己。」他最希望明年舉行音樂會，「我同公司反映過，但都要大家支持，第一次想喺九展Star Hall開騷，因為我喺嗰度（《全民造星III》）出道，呢個舞台畀到我信心同回憶，希望明年尾實行。」