鄭嘉穎爆陳凱琳嗌封肚 被陳細潔誤揭BB性別

鄭嘉穎太太陳凱琳日前宣布再懷孕，即將第三度榮升爸爸的嘉穎，昨日現身活動時心情大靚，但就拒絕透露今胎BB性別；而同場的「鯊魚女」陳細潔卻誤爆嘉穎有「三個仔」，即時被身旁家姐陳小寶截停。

鄭嘉穎、張敬軒、陳小寶及陳細潔等昨日出席「屈臣氏健康美麗大賞2022」活動，即將再為人父的嘉穎春風滿臉到場，指連日收到不少祝賀，他指今胎是上天送的禮物，但不肯透露太太陳凱琳懷胎時間及胎兒性別。嘉穎表示︰「等老婆講啦，我仔女都無所謂，我慣咗同啲仔相處，仔女我都開心。（再生多個做四重彩？）老婆話夠喇，生完呢胎先講喎。」他又大讚太太得天獨厚，沒有任何妊娠反應，喜歡吃甜食但身形完全不像孕婦，又指自己現時很享受湊仔。

嘉穎對第三胎性別保持神秘，但同場的名人陳小寶和陳細潔兩姊妹受訪時，陳細潔口快快露口風︰「恭喜佢，生三個仔，仔係無時停，湊兩個已經好辛苦，湊三個仔就更加忙。」陳小寶即時截住她說︰「未知㗎！可能啫！」場面一度尷尬。

張敬軒預告拍戲裸跑

另外，張敬軒透露日前與魏浚笙（Jeffrey）和白只，為新片《超神經械劫案》補拍一場裸跑戲份，「我哋會喺王菀之同阿正（黃正宜）面前裸跑，仲見到背面嘅『事業綫（股罅）』，我就無偶像包袱，只係天氣凍咗，肌肉密度縮細咗啲咁。」軒仔又爆洪嘉豪在戲中尺度最大，更以「華納湯唯」來形容對方。

採訪、攝影︰倪小珊

美術︰梁政敏