讚兩名兒子有才華「識攞基因」 林敏驄︰我哋係疏堂朋友

林敏驄在劇集《下流上車族》中，與「女兒」郭柏妍及羅毓儀關係親密；現實中，阿驄與前妻陳伶俐育有兩名兒子，大仔林肯是資優生，畢業於港大「神科」的他愛夾band，細仔林善亦入讀港大，二人均盡得父親遺傳音樂細胞及聰明頭腦。不過，「無厘頭」始祖阿驄提起兒子即一臉正經，沒有牙擦擦認叻，又謂自己「無乜做過父親責任」。

現年63歲的林敏驄入行40年，首次拍劇便在《下流上車族》飾演主角車志明，演出細膩認真，令人眼前一亮，贏盡口碑之餘，上周三收視更創27.3點新高。阿驄對今次演出大呼過癮，坦言全因老友兼無綫總經理曾志偉，才請得郁他拍劇。「志偉無咩誠意㗎，淨係喺電話留言畀我，問我做唔做，我話我收好貴㗎，佢話唔緊要，跟住搵人掟兩個麻包袋喺我門口，價錢就合理啦！」

自劇集播出後，阿驄差不多每天都查看收視，又到討論區看網民留言，他一提網民便十分興奮。「你知嗰班連登仔，如果唔通順實會鬧到狗血淋頭，但佢哋無鬧過，全部讚。好多朋友都話從來唔睇劇，但因為呢套劇，佢哋定時定候就坐喺電視前，連移民英國嘅朋友都話有追。我都好surprise網民咁期待，話我帶起追劇潮流？佢哋以為我用番『蘇格蘭場』嗰啲搞笑嘢，但估唔到我咁認真去做。其實我都唔係認真，我只係用真實啲嘅處理方法，因為有鮑姐（鮑起靜）、江美儀咁好嘅演員，如果我亂咁搞就會嘥咗佢哋，依家咁處理幾好吖，啲戲出咗嚟，就連『哈比族』佢哋全部都做得好。」

講粗口示意Cut機

與以好戲見稱的鮑姐及美儀合作，無厘正經的阿驄不敢怠慢，以專業態度跟二人大鬥演技。「我最怕啲演員太多表情，嗡口嗡鼻咁，太用力演就變咗唔自然。我睇番我哋啲場口都好自然，事前無特登排練，一埋位就做，喊又好笑又好，做完就講粗口，唔講粗口佢哋唔敢cut機。藝術係共通嘅，我都係用番我寫歌嘅態度去做，我寫歌時好似有個掣喺條頸度，一有好感動嘅嘢就會震；做戲都一樣，一旦好感動就嚟料，無話計定講第幾句（對白）就要喊。」

提到收視，阿驄有信心結局周會升到30點，又露口風叫觀眾「攬住盒紙巾睇」。問到飾演慈父的阿驄，在現實生活中屬於慈父抑或是嚴父？他左顧右盼表示：「我都無乜做過呢個（父親）責任。」提到兩名兒子皆品學兼優，大仔林肯畢業於港大「神科」IBGM（International Business and Global Management），阿驄正經說：「佢哋叻佢哋嘅事，佢哋自己識攞基因。大仔有夾band，不過唔係我傳授畀佢，係佢自己學，我自己都好忙，唔得閒同佢一齊玩。我幾年先彈一次結他，依家啲細路好叻㗎！」阿驄坦言跟囝囝甚少見面，平時各有各忙，只是偶然以短訊聯絡，更笑指父子間是「疏堂朋友」，「我都唔清楚佢哋有無拍拖，就算拍拖，都唔使帶個女朋友畀我睇，仔大仔世界。」至於囝囝可有收看他的演出？阿驄笑指兒子們可能無興趣，寧願看日劇或美劇。

視帝獎只是「一嚿膠」

阿驄演技獲網民激讚，並狂推他成為視帝，阿驄聞言表示對獎項不太看重，「都唔知有咩對手，有咩對手我都唔驚，對手喺自己度。唔係話你有無信心攞，係你演出嗰陣時已經要做到可以攞到（獎）；你畀咗咁嘅水平，攞唔攞到已經唔關你事，已經係題外話。攞獎好多因素，又要睇你有無命水，所以好難講。既然啲網民咁認同，我就當攞咗㗎喇，獎係咩啫，一嚿膠咋嘛，你畀我梗係受得起啦，唔畀咪當跌咗囉，叫啲網民淘一個返嚟囉，咪一樣，我覺得認同重要過個獎。」

撰文︰倪小珊

美術︰梁政敏

服裝︰LAKH

攝影︰Alma