拍飛車戲面臨生死關頭 蔡卓妍︰我差啲撞死劉青雲

由劉青雲、蔡卓妍（阿Sa）及林峯等主演的電影《神探大戰》，將於本月21日上映。戲中化身女幹探的阿Sa，表示《神》片令她嘗試出道以來多個第一次，甚至要面臨生死關頭，她更直呼︰「我差啲撞死咗個影帝！」

蔡卓妍在《神探大戰》中飾演女幹探，她形容今次拍攝猶如玩極限運動︰「唔係跑樓梯，就係游水，需要嘅體力非常大，拍完呢部戲，我覺得自己身體都好咗！」雖然阿Sa拍過不少打戲，但她直言今次初嘗了很多獨特體驗︰「我從未試過跳海、全身化一個特技粧，每次都要用六至八個鐘，然後仲要行一條好臭嘅渠，嗰條渠真係『包羅萬有』…仲要喺廟街跳樓！跳樓唔係無試過，但喺廟街有好多人望住呀。」

勤力觀摩孕婦舉止

不過，阿Sa指最難忘的經歷，是拍攝一場面臨生死關頭的飛車場面。她憶述︰「坦白講，要我揸車已經係一個好難嘅任務，今次仲要似個賽車手，有一場戲我真係差啲喺公路上撞死青雲！」阿Sa指當時車輛的倒後鏡都裝了大燈，勉強才能看到路，轉彎時差點撞上另一架車。阿Sa續說︰「再揸咗一陣，我幾乎cut綫撞車，我完全無出聲，青雲都好安靜，然後我將架車停喺紅綠燈前。我望住佢，有啲心虛，佢又望住我，兩個人對望然後爆笑！我差啲撞死咗個影帝，好驚呀！」

由於阿Sa的角色同時是一名孕婦，她亦花了不少時間觀摩孕婦的舉止，她表示︰「我真係要上YouTube，睇好多好多片，睇下一個孕婦應該係點樣？如果喺生產過程入面有啲唔順利，又會係點呢？」

撰文︰Crystal

美術︰梁政敏