七仙羽被誤認「阿四」 鄧兆尊︰我食慣揦鮓嘢

鄧兆尊前日應曾志豪和貴花田邀請，客串「田豪祖3寶」YouTube頻道的主持。兆尊身邊已有三位紅顏知己，但近日七仙羽（七師傅）被誤認是其「阿四」，他即時否認傳聞，更笑指自己「食慣揦鮓嘢」，但七師傅太靚女，故對方不是自己杯茶。

「田豪祖3寶」逢星期一至五均會在自家YouTube頻道主持直播節目，由於王耀祖近日飛英國探親，前日一集請來鄧兆尊任嘉賓主持。節目甫開始，兆尊即稱呼貴花田做「李太」，皆因她被指與特首李家超夫人「撞樣」，十分搞笑。

《獎門人》節目陪住長大

七仙羽日前在社交平台分享與兆尊的合照，被誤認是兆尊的「第四房」。曾志豪和貴花田追問有關傳聞，兆尊表示︰「大家太睇好我喇，我邊有佢（七師傅）老公咁好吖！本來佢都同好多人影相，不過佢淨係認到我啫！（係咪你杯茶？）我比較古老啲，屋企人話『女子無才便是德』，佢太聰明喇！我畀慣錢人使，但唔係佢畀錢我使，佢有一億身家，我無喎，點算？」問到「水電煤」三位女友有否呷醋？兆尊否認道︰「無無無，（七師傅）擺明超班。大家知道我食慣揦鮓嘢，執啲街邊豬扒返嚟，佢（七師傅）咁有型咁靚女，我食唔落！」

另一邊廂，曾志偉近期錄製《開心無敵獎門人》，問兆尊可有獲邀？他表示︰「志偉今次安排新人做，佢知我年紀比較大，七師傅我都鯁唔落啦，玩『搵啖食』點鯁呀？呢個節目陪住我哋長大，好多嘢好好笑，因為疫情好多人出唔到街，困住喺度，志偉想帶娛樂同開心畀大家。」

撰文︰倪小珊

美術︰梁政敏