爸爸無預兆失聯30小時 李日朗心急尋親甩底新劇宣傳

李日朗（Don）今年初「回巢」無綫拍劇，得到不少監製招攬，工作不斷。近日Don與蔡思貝和何廣沛合演新劇《你好，我的大夫》，而他前日原定出席該劇的開鏡拜神儀式，但Don當時驚悉爸爸與家人失聯30小時，他為了尋親而臨時甩底新劇宣傳，幸好爸爸最後平安現身，令他放下心頭大石。

李日朗每星期都會相約家人聚餐，周二凌晨他與家人WhatsApp聯絡後，便準備出席周三的新劇宣傳活動，惟活動前卻發現爸爸不知所終，令家人十分擔憂。Don昨日向本報透露︰「我爸爸本來有喺屋企個電話群組應機，但星期二成日都唔見佢蒲頭，由佢覆我哋留言嗰刻計起，佢係消失咗成30個鐘…我由細到大，佢都未試過咁。」

爸爸獨自求醫做手術

Don後來發現，原來爸爸連日來都誤以為自己胃痛發作，劇痛難當的他遂獨自走到政府醫院求醫。Don解釋︰「醫生檢查後，話佢係好嚴重嘅盲腸炎，要即刻做手術割咗佢；爸爸做完手術先聯絡番我哋，但都已經隔咗好耐時間，打佢電話又熄埋機。因為我哋全家人都係報喜不報憂，所以佢無事先同我哋講要做手術。佢醒番之後打電話畀我哋，話想食燒鵝瀨，真係被佢激死！」

雖然Don爸爸平安歸來，但連累Don甩底新劇宣傳，令他感到十分不好意思，「蔡思貝話得我一個無去，我都覺得好對監製唔住，所以想講番件事出嚟。」

撰文︰倪小珊

美術︰梁政敏