童心未泯 吳業坤︰想為Cosplay操6嚿腹肌

動漫節將於下月底開鑼，相信一眾動漫迷定必引頸以待。而圈中亦有不少動漫迷，其中吳業坤（坤哥）特別鍾情《海賊王》，他表示每年均會到動漫節「朝聖」，更希望將來為cosplay操六嚿腹肌。

吳業坤早前公布婚訊，太太被起底是日本女演員濱口愛子，認真可喜可賀。坤哥自小已愛好日本文化，更是動漫迷，特別喜歡看《海賊王》。坤哥直言每年都會到動漫節「朝聖」︰「我試過孭住部200萬像素嘅相機入場，不停搵cosplay嘅動漫迷影相，又會諗『幾時到自己cosplay入場玩，同大家影相呢？』」

坤哥自言要cosplay就不會馬虎了事，除了《海賊王》中草帽海賊團的廚師山治，他亦想扮演《鬼滅之刃》中戴灰色山豬面具的嘴平伊之助，「因為呢個角色要赤裸上身，所以扮之前一定要操六嚿腹肌先搞得掂！」坤哥透露小時候會隨手拿起棉被及攬枕，披在頭上扮演動漫角色，雖然效果不太相像，但十分盡興。

周嘉洛 迫妹妹扮怪獸

周嘉洛小時候最喜歡的動畫是《超人迪加》，他自言愛做英雄人物，所以經常扮超人。嘉洛形容以往看卡通片「睇到上腦」，經常安排當時只有六、七歲的妹妹做怪獸，他強調︰「超人迪加都無任何道具，最多只係十字死光，當然我唔會真係對個妹拳打腳踢，只係作狀打佢，其實我同妹妹感情一直好好！」

嘉洛笑稱自己並非每次都做超人︰「我都試過畀妹妹扮超人，我做怪獸，不過嗰次怪獸贏囉，哈哈！我好勝心真係好強，但大個之後有檢討過呢種行為係唔啱。」問他是否經常欺負妹妹？嘉洛說︰「好耐無做呢啲事，大個咗知道咁做係唔啱，加上傷害到妹妹嘅心靈，就再無蝦佢喇！」

糖妹 扮小雲簡單卻神似

個子嬌小的黃山怡（糖妹），總是予人可愛的感覺，她表示出道後有多次cosplay經驗，印象最深刻的就是扮《IQ博士》中的小雲。她笑謂︰「小雲真係好易扮，服裝易搵，化粧將對眼化大啲，成個造型慳水慳力。」

為求神似，糖妹透露當時買了一個粗框眼鏡，又特意買了一條超闊工人褲，「好記得嗰時係同糖兄一齊扮，佢扮IQ博士，我就扮小雲，我哋配合得幾似㗎！啲fans見到我哋，就好似見到啲迪士尼人物咁追住我哋影相，呢個係我扮過咁多個造型最受歡迎嘅一次。不過如果要我好認真、拎晒道具咁扮真係搞唔掂，嗰啲實在太誇張喇，我簡簡單單就OK。」

採訪︰Pauline

美術︰梁政敏