恨與好姊妹佘詩曼再拍劇 周家怡︰收平啲

周家怡早前於ViuTV劇集《反起跑線聯盟》中與徐立德（Billy）演母子，昨日他們「母子檔」出席活動，提到《反》劇導演劉偉恒計劃原班人馬開拍電影版，家怡說︰「導演有問我得唔得，我梗係OK，如果有小學篇都好。」對於有網民大讚Billy似MIRROR成員盧瀚霆（Anson Lo）及陳卓賢（Ian），Billy即開心表示︰「我鍾意Anson Lo，佢跳舞好勁。」

另外，家怡的好姊妹佘詩曼日前返港，表示若有好劇本，不排除返娘家無綫拍劇；家怡直言希望跟對方再合作，但要視乎劇本及班底，她稱︰「我哋對上一次合作已經係《天與地》，如果有番監製戚其義、阿佘、黃德斌、林保怡同簡慕華呢個班底，我即刻仆去拍。（唔收錢都拍？）我公司唔會肯，收平啲啦！」