入行34年坦承欠安全感 黃德斌︰無開工一排就想放棄

在影視圈打滾多年的黃德斌，去年憑劇集《大叔的愛》人氣爆燈；過往演過不少經典角色的他，跟金牌監製戚其義合作多部無綫劇集，令觀眾留下深刻印象。最近德斌與戚其義再度合作，於AMM亞洲心動娛樂新劇《逐流時代》中飾演名流富商「宋遠圖」。不過入行逾30年的德斌，在man爆外表下仍保持演員獨有的不安全感，令他付出更多心力，享受演戲帶來的滿足感。

黃德斌在《逐流時代》中飾演有型富商「宋遠圖」，延續「大叔」魅力，他跟劇中助手麥明詩及海味舖太子爺麥子樂大玩三角關係，「宋遠圖呢個人物，慾望好強，佢已經擁有一切，但係為咗鞏固地位，就算要犧牲屋企人，都要繼續做落去。」德斌跟麥明詩有不少激情戲，他大讚這位後輩，「樣靚身材好，又聰明，雖則演戲經驗唔多，演過嘅角色又唔太適合佢。今次佢對劇本嘅理解深入咗，當有意見、疑問時，會主動向導演、編劇了解，好易就做到監製同導演要求嘅嘢。」

視戚其義為演戲導師

德斌與《逐流時代》監製戚其義合作無間，二人在無綫曾合作《金枝慾孽》、《火舞黃沙》、《珠光寶氣》及《天與地》等多部經典劇集，兩人亦師亦友，「同阿戚識咗好耐，因為我哋有個共同朋友，加上住樓上樓下而認識。喺以前租碟時代，我哋一放假就去租碟睇，玩又一齊玩，所以大家比較熟，容易明白對方諗嘅嘢；到佢幫我返去舊公司（無綫）時，畀到我演出機會，同時唔會一下子令我有咁大負擔。我由小角色開始做，再到戲份比較重嘅角色，令我有所成長，佢係我演戲生涯嘅一個導師。」

由1998年首次演出戚其義監製的劇集《天地豪情》，到04年《金枝慾孽》擔正，德斌當時十分緊張，「人哋畀一個咁重要嘅角色我，我希望做到人哋嘅期望，所以特別緊張。阿戚會睇住我，睇我表現咗出嚟，佢再去調節；然後佢再發掘我更多嘢，想我有更多嘗試。所以我接演嘅角色類型愈嚟愈多元化，阿戚寫嘅人物比較複雜，每次演出都好似考試咁。」

非偶像派要默默耕耘

德斌由臨時演員做起，演藝生涯至今已34年，他自覺尚算幸運，「入行頭五年，我都係做緊所謂甲乙丙丁嘅角色。期間拍過電影，識咗班電影人，幕前無嘢做又轉咗去做幕後，又識咗另一班人，了解咗更多戲劇嘅嘢。後來遇到阿戚幫我再次返去幕前，遇到令觀眾印象深刻嘅角色，所以我非常幸運。過程係咪辛酸？我已經唔再去諗呢樣嘢，但辛酸梗有㗎啦！無理由次次都咁順利，每個人一出嚟就做偶像？我唔係呢種類型（偶像）嘅時候，就必然要用呢種途徑（默默耕耘），先做到今日。」

德斌坦言︰「咁多年嚟梗係諗過放棄，仲放棄過好多次！做演員好奇怪，無開工一排，就會想放棄，『係咪要搵第二啲工作？再坐喺度唔掂喎！』呢啲諗法經常都有，甚至依家幾個禮拜無工開，個心都會囉囉攣。其實演員就係有種不安全感，呢種不安全感令你更加注意，繼續pay effort（付出）落去。」

【一按睇片】

撰文：黃曉妍

攝影：林君茹、何家賢

美術：梁政敏