長期居家抗疫 張家輝開心與關詠荷重拾拍拖感覺

張家輝昨日出席《第四十屆香港電影金像獎》公布入圍名單記者會，已久未有公開露面的家輝，透露最近長時間留在家中抗疫，與太太關詠荷重拾拍拖的感覺，「多咗時間同屋企人一齊，我同老婆去行山、散下步，以為已經無機會做呢啲嘢，點知又有喎。（「困獸鬥」無發生摩擦？）我哋已經過咗呢個階段，囡囡就成日對住部電腦上堂。」

家輝早前計劃今年五月開拍自導自演的新片，惟他直言受疫情影響會押後開拍︰「我諗年中前都未必開到鏡，所有嘢要押後，我四月會去內地拍一部偵探片先，預計逗留兩、三個月。」會否出席今屆金像獎頒獎禮？家輝表示︰「身為業界一分子梗係要支持，檔期夾到就無問題。（睇好邊位男、女主角？）男就個個都做得咁好，唯一遺憾嘅係我無份入圍，所以要繼續努力；女嘅我無睇晒啲戲，唔方便評論。」