麥當勞招財福堡載譽歸來 牛堡即日率先登場 新春限定My Melody包裝

每次新年，麥當勞都會搞搞新意思，公關姊妹同黛安講，一系列麥當勞新春限定美食又將載譽歸來！大家都好熟悉嘅招財牛堡同黃金脆薯牛堡，即日起率先登場，到今個月24日就有全新嘅「黃金菠蘿雞堡」，以鬆軟麵包配上板燒雞腿同爽脆生菜，再加入酸酸甜甜原片菠蘿，等大家大「雞」大利；同日仲有經典招財雞堡回歸，4款招財福堡都咁有特色。

仲有全新紅豆吉士粉紅批

如果係My Melody粉絲就要注意喇，因為今次新春限定食品係用上可愛嘅My Melody卡通圖案包裝盛載㗎。姊妹仲話，今日去麥當勞更可買到全新登場嘅紅豆吉士粉紅批，粉紅色酥脆外層配上香甜綿滑嘅豆沙同吉士醬；而小龍蝦湯及大大杯白桃梳打亦會同步回歸；即日起買任何招財福堡套餐，仲會獲贈精美利市封㖭。

此外，即日起麥當勞親子會會員更可以用麥當勞App電子優惠券，優先以$48換購My Melody開運籃，粉絲唔好錯過啊！