放空發呆排解壓力

你有壓力，佢有壓力，我有壓力，但係你又知唔知係乜嘢令你有壓力？你會點樣對待壓力？

適度壓力可提高工作效能，但長時間處於高壓狀態，卻會侵蝕人嘅身心健康。

美國耶魯大學和柏克萊大學的研究顯示，壓力會直接影響腦部功能；適度壓力促進腦部記憶細胞生長，但過多壓力不但抑制腦細胞嘅生長，弱化腦部自我控制能力，仲會引發心血管疾病、憂鬱、肥胖，以及認知功能退化等等。

近排我去做按摩同通淋巴，按摩師㩒我背脊嗰陣，話我硬到不得了，問我做乜咁緊張？我答佢話好似唔覺得自己好緊張喎。佢話身體最誠實，叫我盡量放鬆自己。

我諗諗吓，係喎。自從媽咪有咗腦退化症之後，我時時刻刻都好似「on call36小時mode」，尤其係當夜晚接到電話，真係「午夜凶鈴」，會嚇到震，要時刻留意住媽咪有無半夜起身，驚佢又唔知有乜嘢幻覺。可能呢啲壓力已經滲咗入腦，同埋我發現體重無升，但係點解咀嚼肌大咗？原來我瞓覺時不自覺咁咬牙。原來精神緊繃，時刻感到焦慮同易怒，都可以係造成磨牙嘅主因。Oh my God！唔想咁樣，可以點樣？

南韓社會普遍生活壓力大，樣樣講求高效率，節奏急促，加上疫情影響，為咗紓發壓力，近幾年南韓興起一股「放空」風潮，舉辦咗「發呆大賽」。亦開咗所謂嘅「放空茶室」，令顧客彷彿進入唔同時空，暫時拋開世俗嘅煩惱。

呢間叫「綠色實驗室」（Green Lab）嘅綜合型茶室，店內從1樓到3樓各有不同設計，從花店、瑜伽冥想室、茶室到頂樓花園，讓顧客可以坐在大片落地窗前，睇住森林，享受完全放鬆嘅平靜時光。「放空茶室」規定進入特定空間後就不能說話、手機靜音、須脫鞋發呆就坐等。分析認為，發呆文化可以抗衡一下樣樣都要快而造就嘅壓力。因此我都要取經放慢自己，搵機會畀自己發呆了！

（本欄逢周四刊登）