獲封美魔女有壓力 康華恨做女主角：要保持渴望

剛踏入50歲的康華向來是最強美魔女，凍齡有術的她在《十月初五的月光》中與海俊傑做熒幕情侶。94年選港姐入行的她，即使在圈中逾20年，仍然渴望在無綫當上女主角：「要保持住有heart，先會演得好。」

康華在2000年原版《十月初五》飾演金勝媽媽，在新版則飾演祝展輝太太馬冰心。她笑說：「之前我演『金勝阿媽』，被『萬朱莎華』迫到跳樓，今次『萬朱莎華』就想搶我老公。我好鍾意『馬冰心』呢個角色，比較溫文接近我性格，希望畀到觀眾新鮮感。如果有得揀，我真係個個角色都想做！」繼《星空下的仁醫》後再與海俊傑演一對，康華笑說：「之前同韋家雄、郭晉安合作（演熒幕情侶），今次就海仔，三個唔同性格、唔同感覺，每次演熒幕情侶都有新火花，好開心！」

父母從不催婚

問到目前單身的康華，現實中是否已遇到Mr. Right？她說：「Mr. Right呢…我覺得最緊要隨緣，時機未到，時間到我一定好好珍惜。父母覺得我開心就得，感情係自己感受嘅，最緊要自己舒服、開心，所以佢哋從來無催過我㗎！」保養得宜的她是圈中出名的美魔女，她笑言對此封號「有啲壓力」，「喺呢個年代，keep fit係對自己負責任，間唔中覺得辛苦時會去平衡下、運動下，咁樣會令自己開心；想食乜嘢就隨意去食，但食完之後要做番適當運動，覺得呢個方法幾好。」

07年，康華曾離巢無綫往內地發展，在內地劇初嘗女一滋味；及後她為照顧父母決定回港，回歸娘家後多演配角，直至在15年《刀下留人》演萬貴妃，獲觀眾大讚是「最正奸妃」。入行逾20年，康華依然恨做女主角，「每位演員都會有呢個渴望，好慶幸喺第二度拍戲都試過做女主角，有過演重要人物嘅機會…從事呢樣嘢（演藝事業）要好有heart，一定要保持住，先會演得好，齣劇先會好睇。heart一直都有，我唔會掉低，無論做主角或其他角色，係要有呢份heart先會做得好。」

【一按睇片】

化粧︰Marc Woo@MM AVEDA

撰文：梁榮達

攝影：何家賢、馮凱宜

美術：梁政敏